Daralla Olifanjes ha Bestes Erel 1

This is the first draft of a new story I am writing for children and Cornish language learners. There is a parallel English version, which I am not posting here. I have purposely chosen to write a continuous narrative in the present tense. The narrator is a ten-year old schoolgirl.

Chaptra Onan: Dalladh Daralla

 “Ma othom dhebm a olifans gwydn.” Lev ow hôr Rosa ew hedna. Nag o nei bès nowydh devedhys tre dhort scol.
 “Gwra gofyn ort dha dhama wydn!” Lev agan dama ew hedna.
 Ma hei ow cosôwes bès hanter orth Rosa. Hanter hy rach ew kemerys gen caletter aral. Fatel ell hei gwitha Arthòr, agan broder bian, dhort towla yos tettys ort an gath? Ma dhodho gallos marthys rag nebonan ew bès dew vloodh coth. 
  "A nag ew an gath ha dha hogh Gyny lowr rages?" Lev Tristan, agan broder cottha, ew hedna. Ma va ow wherthin.
  "Prag a venjes ta cawas olifans gwydn, poran?” Henn ew agan sira. Puppres den mar heweres! 
 “Rag an gwerth olifanjes gwydn en fer an scol, pur apert! Rag fra ken?” Ma mir meskegys dhe Rosa. 
  Whath ma Tristan ow wherthin. 
  “Drog ew genam, chîl vian, egery dha lagajow, bès nag ew gwerth olifanjes gwydn rag gwertha olifanjes gwydn.”
  “Nag eram ow convedhes.” Ma mir trûan dhe Rosa.
  “Olifanjes gwydn ew taclow nag eus whans anodhans dhe düs na velha.”
 “An taclow henwys ‘atal’ gen Mabm?”
 “Nantei, tabm veth. Anjei ell bos da lowr, bès na ell tüs cavas ûs vetholl ragtans.”
 “My alja ûsya olifans gwydn.”
 “Ma nebes taclow ew destnys dhe vos olifanjes gwydn. Pernys ens, ha wòja hedna thens res dhe ves, dhe vos gwerthys arta. Thens radn an economieth.”
 “Na whath! Penag oll vo anjei, ma othom dhebm a onan anodhans. Eus olifans gwydn dhis?”
 Lebmyn ma geryow Tas ow tasseny geryow Mabm.
 “Gwra gofyn ort dha dhama wydn!”
  Rag hedna, thera nei ow mos, Rosa ha my, dhe jei agan dama wydn en ogas; a-dreus dhe’n pras gever Henvam, dres rew a wedh Nadelik, dres geverjy ha gweythva e’n lôwarth, ha bys en daras kegin agan dama wydn.

Chaptra Dew: E'n Soler

 “Mabm Wydn! Ma othom dhebm a olifans gwydn.”
 “Ha Rosa. Ha Kettern. Dewgh chei! Olifans gwydn? Gero nei dhe whilas olifans gwydn.”
 Rag fra nag eus marth dhedhy? Da via genam godhvos. Eus olifans gwydn dhedhy, martesen? Ma hei ow 'gan ledya bys et hy chambour. Ma copart brâs bedn an vos a-dâl dhe’n veister.
 “Gwra egery an amary, Kettern.”
 Theram owth egery an copart, saw nag eus olifans gwydn etto. Et y le, ma skeyl, ow sevel emann tûa soler dadn an to deiys.
 “Gero nei dhe vos emann.”
 Lebmyn thera vy ow kemeres marth. Mabm Wydn ew coth, bès hei ell crambla pur üskis. En scon thera nei oll e’n soler, reb cofer cawrek. Ma lies tokyn stag ort keniver trenewen ha’n còvren, gen henwyn teleryow tremor.
 “Gwra egery an cofer, Rosa.”
 Poos ew an còvren. Na ell Rosa y dherevel hy hònan oll, etho theram ow qweres dhedhy.  Ma lies pegans e’n cofer. Gorlenwys ewa gen oll sortow taclow. Na ellama gweles olifans gwydn veth. Ma nebes dilhas coth ha pil a vlew dû, pecar’a best marow. 
 A-dhesempis, ma’n pil blewek ow qwaya. Theram ow lebmel ha ma Rosa owth üja.  Ma’n pil a vlew dû ow sevel emann war beder garr gompes ha nena, gen hager tros, ma va ow pònya a-dreus dhe leur an soler dhe’n skeyl ha mos mes a wel. Ma Mabm Wydn ow wherhin. Lacka ew hei vel Tristan rag grysla!
 “Mehal! My 'wrüg crejy dro va kellys. Pana gath wòcky! E’n cofer ow dama oll an termyn ma”
 “Pana dermyn a wrüg an gath mos war stray, Mabm Wydn?" da via genam godhvos. "Na wrüga vy hy besca gweles kens lebmyn.”
 “Nanj ew lies bledhen, chîl vian.”
 “Rag fra nag ew hei marow, dhana?”
 “Drefen bos Mehal Marthys. Gorgath ew ev, Gorworgath!”
 “Ha piw a bew Mehal Marthys?”
 “Dama vy, agas hen-henvam.”
 “A vedh an gath oll en compòster?” Rosa ew troblys. Bestes ew da genjy.
 “Entei. Ha lebmyn, fatla kra nei trouvya olifans gwydn?”
 Dadn an dilhas coth ma taclow erel, mar lies tra. Thera nei ow kemeres marth pothew neppeth kevys gen Mabm Wydn - na üdn olifans en üdnek saw dew olifans. Nag ew anjei gwydn poran, ha nag ens brâs naneyl. Bian ens ha nebes melyn.
 “Thew an olifans-ma gwres a dhans olifans.”
 “Hedna ew banys, anan?”
 “Cübmyes ew mothew coth lowr.”
 “Ha ew hebma coth?”
 “Entei. Pur goth ew.”
 “Ha’n olifans aral?”
 “Henn ew gwres a blastyk.”
 Coynt ew an dhew olifans. Ma garrow hir ha tanow dhe’n olifans dans olifans ha dhe’n olifans plastyk scovornow brâs avel an re Dumbo. Ma mir hager dhodhans, ort ow bres.
 “Teg ens!” Henn ew Rosa. “Da ew genam an olifanjes-ma. Me a’s car anjei!”
 “Ma othom dhis a olifanjes gwydn rag an scol, anan, Rosa? Ha chy, Kettern? Eus othom dhiso jy a neppeth rag an scol?”
 “Dilhas coth. Pur vlewek.”
 “My a wra whilas. Martesen an re ma a via da lowr. Nag ens re vlewek. Thera anjei war an wariva. Dhe les ens. Sira vy o hüdor a’n wariva. Nag eus othom dhodho. Ev a verwas.” 
  Ew Mabm Wydn nebes grevys gans hy thas? Da via genam godhvos.
 An dilhas ew hatt hir dû ha mantel dhû, rüdh y ispadn. Thew an dhew nebes skith ha podnek, bès da ens genam. Lebmyn tho vy maga lôwen avel Rosa.

Chaptra Trei: Parys rag an Fer

 Nag ew Rosa lôwen. 
 “Ma whans dhebm a witha an olifans-na raga vy ow hònan.”
 “An dhew?”
 “An olifans wheg, brâs y scovornow.” 
 “Martesen chy alja y berna.”
 Otta nei e’n scol. Nei a brofyas bès lebmyn an dhew olifans dhe’n descador Rosa rag an gwerth olifanjes gwydn. Whath ma minwherin ledan war y vejeth. Da via genam godhvos pandr’üjy va ow cavas mar dhidhanüs.
 Lebmyn res ew dhen rei an hatt ha’n vantel dhe’m descadores vy rag an stall dilhas coth. Ew hei plesys? Ma lies dilajas gwelha, etho piw a venja perna agan taclow scübellek nei? Bettegens, ma dhen scòdhlen owrlynüs teg dhort Mabm, magata – scòdhlen gwres gen agan Modrep Senara. Hemm ew gwell avel an taclow dhort Mabm Wydn. Modrep Senara ew desinores oldhawor en Loundres.
 De Sadorn ewa hedhyw, saw nag ew pres rag an fer scol, na whath. Mettin ew lebmyn, ha’n fer a vedh e’n dohajedh. Ma othom dhen a voos. Pres li ew ha gwag oma. 
 Rosa ha my, ma nakevys genen an dhiw agan croust. Nei a gerdhas òbma, drefen bos Mabm ha Tas besy an dhew. Nag eus whans dhen a gerdhes lebmyn dhe ’gan chei ha nena tre dhe’n scol arta. 
 En gwelha pres, nag era nei pell dhort an shoppys. Ma chei pobas en ogas. Nei ell cawas hogen, ha martesen badna sugen. Ma nebes mòna dhe nei rag an fer. E vedh res dhen ûsya radn anodho rag boos.

Chaptra Pajar: Agan Cowetha

 Pres croust ew ha thera nei ow metya gen flehes moy en pras an scol. Ma’n howl ow spladna ha nag eus cloud veth e’n ebòrn. Rosa ha my, thera nei ow radna üdn hogen ha botel a sugan yntredhon. Res ew dhen gwitha agan mòna rag an fer.
 Ma Jory Curnow òbma rag goheles y dhama. “Ma pemp pens dhebm rag perna neppeth dhe les,” emedh.
 Ma Tòbmas ha Tamsin Penrose òbma ewedh. Agan kentrevogyon an nessa ens. Trigys en jei e’n ôstel reb an eglos gen aga theylû. Agan tasow ew cothmans. Thera anjei en scol warbarth e’n dedhyow coth.  
 Tubby ha Tammy ew gevellyon, pecar’a Rosa ha my, saw gevellesow egwal o nei, ha nag en jei. Ma dhe Rosa ha dhebm an keth bejeth, an keth lagajow ha’n keth blew, kenth o vy tabm hirra ha hanter our cottha.
 “Nei ’vedn gwary oll an gwariow.”
 “Gero’ nei dhe vos, dhana. Na venja nei bos re holergh.”
 Thera nei ow trouvya oll an stallys en hel an scol, ha ma Rosa ow mos straft dhe’n gwerth olifanjes gwydn.
 “Pur dha via genam perna an dhew olifans gwydn my a dhros e’n mettin ma.”
 “Pur dhrog ew genam, Rosa, bès pernys ens solabres, gen dama Jory.”
 Nei ell gweles keyn ledan mabm Jory ha hei ow tremena an hel tûa'n stall dilhas coth. Ma mir trûan dhe Rosa. 
 Lebmyn, thera nei ow mires orth an venyn vrâs ha hei ow perna an vantel dhû ewedh. Ma sagh brâs dhe Vestres Curnow, ha solabres thew ev leun a daclow, oll sortow taclow. Rag fra ma mar lies tra dhedhy? My ’venja godhvos. Nebes crav ew hei.
 Ha pe le ma agan teylû nei? Ma bush brâs a düs e’n hel, bès na ellama gweles person veth dhort agan treveth. Na vedh tra veth gerys!
 “Pegebmys pris ’wrüg Mestres Curnow pe an vantel dhû?”
 “Dew bens. Hei a leveras dr'ew plos.”
 “Nag ew hedna bès nebes!”
 Lebmyn ma Mestres Curnow ’ombla gen hy mab reb an stall dilhas coth. Ma whans dhe’n dhew a’n keth tra; an hatt hir dû ew hedna. Ma Jory ow tedna an hatt war üdn tû, ha ma y dhama ow tedna war an tû aral; eneth, diweth, teyrgweyth. En rag ha war dhelher! Dhe Jory an vyctory - heb sqwardya an hatt. Dew bens rag an hatt hir. Whath ma trei fens dhe Jory rag perna neppeth ken.
 Rag fra 'venja Jory cawas an hatt kebmys? My a venja godhvos.

Chaptra Pemp: Spenja agan Mòna

 Nag ew possybyl rag Rosa ha raga vy dhe berna an olifanjes gwydn, na an mantel dhû, na an hatt hir dû. Saw nag ew hedna mater brâs raga vy. Ma dhe vabm Tubby ha Tammy kisten a liwyow bejeth. Descadores art ew hei. Hei a dhescas Modrep Senara.
 “My ’venja bos tycky Duw, mar pleg.” Tho vy puppres pur gortes. “Pand'wra vy pe?”
 “Hanter cans diner, mar pleg.” Etho, ow bejeth ew payntys pur deg - purpur ha rüdh y liwyow, pecar’a mantel rüdh.
 “Meur ras dhe whei, Mestres Penrose.”
 “Bestes ew da genama, bestes gwyls dres ehen.” Lebmyn ma whans dhe Rosa bos tigres. Ma Mestres Penrose ow cavas crayon bejeth rüdhvelyn et hy histen a liwyow.
 “’Venjes ta bos tiger garow po tiger wheg?”
 “My a venja bos tigres vüscok!” Etho, ma Rosa ow treylya dhe digres rüdhvelyn coynt.
 Tho nei agan diw pur lôwen. Bès pandra moy alja nei perna gen agan mòna?
 “My ’wra perna tesednow! Whath tho vy gwag. Na veu croust lowr dhen.” 
 Boos ew da lowr rag Rosa, bès ma whans dhe vy a neppeth moy dhe les. Ottòbma stall losow. Pana sort losowen a venjama cawas? Ma lies losowen vian a wra cressya brâssa. Theram ow perna pemp losowen fav vian dhe vos gonys et agan lowarth. Debry fav ew gwell genam avel debry tesednow, ke vo res dhebm gortos termyn hir.

Chaptra Whegh: Stall Know Côcô

  Etho, ma bejeth rüdh ha purpur genam, pecar’a tycky-Duw mantel rüdh, ha ma pernys genam pemp plans fav bian. Pandr'a wra vy gwil nessa?
  “Lôwena dhis, Kettern. Losow wheg?” Henn ew lev agan dama wydn. Wostiwedh agan teylû! Theram ow treylya a-dro. Ma ’gan broder bian, Arthòr, òbma ewedh.
  “Lôwena dhis, Mabm Wydn. Ha Arthòr. Lôwen o vy dhe ‘gas gweles whei. Bès pe le ma Mabm ha Tasyk?”
 “Whedhel hir ew hedna, Kettern! Res veu dhe dha Vabm mos dhe'n clojy gen Tristan. Ev a dorras y vregh en dalhen." Tristan, agan broder brâs, ew gwarier rugby gwressek et y scol nessa. 
  "Ha dha Das, gellys ew ev gen Modrep Senara en neb le.”
  Ma canstel helyk gen Mabm Wydn. “Ellama gweres dhis?” emedh hei. "Gwra gòrra an plansow et ow hanstel.”
 “Gwary! Towla pel!” Fysslek ew Arthòr. Nag ew da ganjo bos cosel ha na wil tra veth. Ma va ow mires orth stall know côcô, ogas dhe’n stall tesednow.
  Theron ow qweles Rosa, tigres vüscok, ena solabres, ow tebry tesen choclat ha clappya gen Mestres Penrose.
  Gorfednys ew Mestres Penrose gans hy liwyow bejeth. Keniver flogh ew afinys – ha whath üdn sira po dew ewedh!  
  “Durda dhis, Natalie." Mestres Penrose ew cowethes da agan Mabm Wydn.
 “Nei oll a venja cawas towl, theram ow pedery,” emedh hei. “An yonca a dal bos an kensa.”
 Etho, ma Arthòr ow towla pel rüdh calys tûa pemp knofen gôcô gòrrys en res war fram. Straft ma’n pel ha’n kensa knofen e’n res ow codha dhe’n leur, gen clattra.
 “Gormenadow. Henn’ew dha bowas! Ty a waynyas. Nag eus bès peder knofen gôcô gerys lebmyn.”
 “Know drog!” Nag üjy agan broder ow leverel lies ger. Nag ew da ganjo know.
 “Chy ell y rei dhe’n edhyn, dhana. Deus hons ena gena vy", medham, "ha chy ell towla kelgh war neppeth deffrans. Chy alja gwaynya ro bian rag Mabmyk, martesen.” 
 Arthòr ha my, thera nei ow kerdhes a-dreus dhe’n hel, ha Rosa ha Mabm Wydn whath ow towla pelyow ort an know, heb sowena veth. Heb caletter, ma Arthòr ow cawas powas moy – botel bian a sawor ras. Ma Henvam ow kil perfûm gwell avel hebma!
  “Yew, Arthòr! Deus òbma. Ma whans dhebm a gnofen moy. Ma othom dhebm a dha allos!” Nag ew Rosa contentys gen üdn gnofen en üdnek. Whath ma peder knofen gôcô ow remaynya.
 “Otta dhis.” Ma hei ow rei hy diwettha pel dhe ’gan broder bian. Ma Arthòr ow pedery, ydn y lagajow. Ma y vregh ow mos war dhelher ha, distowgh, ma va ow towla. Bòbm! Ma’n nessa knofen e'n res ow tardha. Ma mir a jagg war vejethow Mestres Penrose hag oll an düs adro dhedhy. Ma gallos marthys dhe Arthòr rag nebonan nag ew bès dew vloodh coth.
 "Ober da, Arthòr! Chy a waynyas knofen gôcô moy." Ma nebes persons ow talladh tackya diwla.
 "Arta, mar pleg!" Ma Mestres Penrose ow rei pel glas dhe Arthòr. Bòbm! Ma'n tryja knofen e'n res ow crackya ha codha dhe'n leur.
 "Pyjy, moy!" Bès ma coseleth sowdhenys e'n hel rag polj bian, nena ma hanajow ow talladh.
 "A wrüss ta gweles hedna? Na wrüga vy gweles tra veth a'n par na kens lebmyn."
  “Y vedh othom dhen anodho rag an para cricket en nebes bledhednyow.!” 
 "Henn ew lowr Arthòr, theram ow pedery," emedh Mabm Wydn en ûhel. "Gwra gara nebes know côcô rag tüs erel." 
 "Ma othom dhebm a'n know côcô Arthòr - rag an pednow palyon e'n lowarth," emedh Rosa. Ma hei war bedn dewlin ha hei ow cuntel oll an scòbmow dhort an leur. Ma hei ow pedery pub termyn a'n enevales.
 "Da lowr, Rosa, ma'n teyr knofen et ow hanstel, gen losow Kettern. Ha lebmyn, pres ew mos tre, theram ow pedery."

Chaptra Seyth: Hatt Hir Jory

 Otta nei en scol arta. Thew de Lün wòja fer agan scol. An fer a veu sowena vrâs. An scol a gawas showr a vòna rag y dowl. Ma Jory ow tegy y sagh en pub telher. Na vedn ev y wòrra war an leur, na war y vagh, na war y vord.
 “Jory, prag thesta ow qwitha dha sagh genes oll an termyn?” my ‘venja godhvos.
 “An hatt ew! Pur specyal ew.”
 “Fatel ’alja va bos specyal?”
 “Gwra metya genam war wòles an pras en termyn gwary. My ’wra disqwedhes dhis.”
 Na vadna vy gòrtos. Pur hir ew agan descas Sowsnek, my a hevel. Bès wotiwedh ma diwedh dhe’n descas ha my ell mos an pras war-nans. Ma Rosa ha Jory ena solabres, reb an ke.
 “Gwra disqwedhes dhen dha hatt mar specyal! Na veu va pur specyal en soler agan Mabm Wydn.”
 “My ’ell tedna cònin gwydn 'nodho! Pecar’a hüder.”
 “Na wra talsogh. Rag hüder dhe dedna cònin a-dhor hatt res ew dhodho cüdha cònin etto en kensa. Eus cònin gwydn dhis? Nag eus spas lowr en dha sagh.”
 “Entei, ma dhebm cònin gwydn lebmyn. Ma va en tre, en kisten gartbord e'n chambour vy.”
 “Nag eram ow crejy ger veth!” emedh Rosa. “Chy a res disqwedhes dhen.”
 “Entei, my ’wra disqwedhes dhewgh.”
 Ma Jory ow kemeres an hatt hir mes a y sagh. Saw nag ewa hir. Tabm veth. Mar leven ew avel bord. Nag eus spas lowr rag cònin veth. Ma va ow kerna an hatt. Distowgh thewa hir arta. Ynflamyes ew Jory.
 “Nag eus cònin veth et ow sagh, ha na wrüga vy cüdha cònin veth e’n hatt!”
 “Nei ’ell gweles hedna.”
 “Rag hedna, hüder o vy.”
 “Thera nei ow còrtos!” Myskemeryans ew leverel hedna. 
 Ma Jory ow herdhya y dhorn ... ha bregh ... a-bera dhe’n hatt. Ma va ow tedna mes ... cònin gwydn. Jimmery-cry! Theram ow kemeres marth brâs. Nebes sowdhenys ew Jory y hònan. Soweth! Ma va ow cara an cònin dhe godha. Lebmyn ma’n cònin ow pònya dres toll e’n ke. Ma Rosa ow tonsya adro gen meur joy ha lôwena - ha ma hei ow kychya an hatt mes a dhorn Jory.
 “My ewedh! My ewedh! My ’vedn ’saya.” Ma hei ow plunkya hy bregh a-bera dhe’n hatt, pecar’a Jory, ha tedna mes cónin gwydn moy. Ma'n cònin-na ow pònya dhe vetya gen y gothman a-dhelher dhe’n ke. 
 “Na wrew’ hedna arta,” theram ow pyjy. Saw nag üjy anjei ow hedhy. Mons ow pejya en tedna mes cònines moy. Na wörama pegebmys moy.
 Ma'n clogh scol ow seny lebmyn. Ma diwedh dhe'n pres gwary, ha gellys mes a wel ew oll an cònines a-dhelher dhe’n ke. Ma Jory ow settya y hatt en üskis et y sagh, ha thera nei ow pònya e’n scol gen oll an flehes erel.

Chaptra Eth: Deray Cònines

Nag era vy ow rei scovarn dhe’n nessa descans. Na ellama y wül. Troblys o vy. Ma caletter brâs dhe nei: fatel ellen nei gòrra dhe ves mar lies cònin gwydn? Ma esperans dhebm na vo an cònines gwelys gen nagonan aral. 
 E vedh pres kidnyow en scon, anan? Ma sawor a voos ow tos dhort an gegin: scavellow cronek friys, cowl caretys hag onyon, pasta gen sows kig. Gwag o vy. War an diwedh ma'n clogh ow seny. Ma nebes flehes ow còrra aga ober war gopart reb an veister. A-dhesempis, mons ow creia ha wherthin.
 “Ottena! Ottena! Gwrew’ mires orth an cònines!” Soweth, oll an bès ell gweles cònines. Bès pes cònin? Theram ow mos dhe vires. Ma routh veur a gònines gwydn war an gwels ogas dhe dharas an scol. Mons ow sedha, ha frikwhetha, gwag aga mir. Martesen, thew sawor an caretys da ganjans; po martesen thew sawor an scavellow cronek. Na wörama. 
 Bettegens, penag a vo an caws, nag üjy an cònines ow trigas termyn hir ena. Ma lies flogh ow pònya der an daras ha ’ga chassya oll adro dhe’n pras. En scon, thew an pras leun a gònines ha flehes ow pònya en rag ha war dhelergh. Müscotter ew. Pub tra oll en deray! Theram ow pònya ewedh, terebo my dhe gavas Rosa ha Jory.
  Nag era vy ow rei scovarn dhe’n nessa descans. Na ellama y wül. Troblys o vy. Ma caletter brâs dhe nei: fatel ellen nei gòrra dhe ves mar lies cònin gwydn? Ma esperans dhebm na vo an cònines gwelys gen nagonan aral. 
  E vedh pres kidnyow en scon, anan? Ma sawor a voos ow tos dhort an gegin: scavellow cronek friys, cowl caretys hag onyon, pasta gen sows kig. Gwag o vy. War an diwedh ma'n clogh ow seny. Ma nebes flehes ow còrra aga ober war gopart reb an veister. Adhesempis, mons ow creia ha wherthin.
  “Ottena! Ottena! Gwrew’ mires orth an cònines!” Soweth, oll an bès ell gweles cònines. Bès pes cònin? Theram ow mos dhe vires. Ma routh veur a gònines gwydn war an gwels ogas dhe dharas an scol. Mons ow sedha, ha frikwhetha, gwag aga mir. Martesen, thew sawor an caretys da ganjans; po martesen thew sawor an scavellow cronek. Na wöra’vy. 
  Bettegens, penag a vo an caws, nag üjy an cònines ow trigas termyn hir ena. Ma lies flogh ow pònya der an daras ha ’ga chassya oll adro dhe’n pras. En scon, thew an pras leun a gònines ha flehes ow pònya en rag ha war dhelergh. Müskotter ew. Pub tra oll en deray! Theram ow pònya ewedh, terebo my dhe gavas Rosa ha Jory.

Chaptra Naw: Remedy Rag Cònines

    “E’n scol! Pubonan e’n scol!” Ma Mester Angove ow sevel derag daras rag an scol, ow whibana ha garma. Pur serrys ew ev.
 “Dew’ chei! Poken, na vedh kidnyow dhe nagonan.”
 Ma lies flogh, gwag bès anvodh, ow talla kerdhes e’n scol, heb fistena ha gen lies mir wardhelher, tû ha'n cònines; saw Rosa, Jory ha my. Thera nei owth omgüdha war an dor a-dhelher dhe’n ke ha gortos gen nebes cònines. Wotiwedh ma coseleth.
 “Lebmyn, ple ma dha hatt?”
 “Ottava. Òbma. Rag fra?”
 “Oll an cònines a dal mos e’n hatt. Jei ’wrüg dos mes a’n hatt. Rag hedna, res ew dhen aga gòrra etto arta.”
 “Fatel ellen nei gwil hedna?”
  “An hatt a gawsyas an caletter; endelha, ev a dal rei gorryp. Pandr’ew hebma, e’n bond hatt?”
  Thera vy ow cavas botel pur vian etto. Ma tokyn stag glenys orto, ha scrifys warnodho an geryow pur vian ‘DINYANS CARETYS'.
 “Pandr’ew an gwelha tra gen cònines?”
 “Caretys?”
 “Entei! Hemm ew an gorryp; ‘dinyans caretys’ e'n botel bian ma.” Theram ow scòllya an lin e’n hatt ha gòrra an hatt war an gwels rebam, a-dhelher dhe’n ke. Ma cònin an nessa dhe’n hatt ow lebmel etto. Nena an nessa cònin, ha nena an nessa. Scon, ma oll an cònines ow tos en üskis. Onan hag onan, mons ow lebmel e’n hatt, bys nag eus cònin veth, na whath, war an gwels. Caletter gellys. 
 Bès lebmyn ma dhen caletter aral. Fatel ellen nei mos e'n scol mar dhiwedhes heb wher?  Ma Jory ow plegya an hatt hag y wòrra et y sagh. 
 Ma Rosa ow sevel emann, bès, desempyas, thera vy ow tedna hei war an dor arta. Ma mir truedhek dhe Rosa ha ma hei ow tallath ola.
 “Hedna ’wrüg browy ow fedndewlin. Mir! Ma gooj. Prag chy a wrüg hedna?”
 “Drefen bos othom dhe nei a excûss rag bos mar dhiwedhes. Chy a res bos browys ha Jory ha my a wra dha scodhya a-berth e’n scol. Gwra cloppya nebes!”
 Endelha, gen dagrow war hy bejeth ha gooj ha prei war hy glinyow, Rosa ew gweresys, ow cloppya, e’n scol. Rosa ell bos gwariores vas.
 “Whei trei arta!!” emedh Mester Angove ha ev dhe glanhe dewlin Rosa. “Kidnyow ew kellys genow’. Pres descajow dohajedh ew lebmyn.”

Chaptra Deg: Derivas Paper Nowodhow

  Tremenys ew remenat an seythen en scol heb caletter aral veth. Lebmyn, otta nei e’n chei ha ma 'gan sira ow redya y baper nowodhow Gwener. Ma va ow terevel emann y lagajow.
  “Kettern? Rosa? Ero whei ow codhvos nebes adro dhe hebma?” Ma va ow poyntya dhe neppeth war an volen rag. 
  “A bandra es ta ow cows, a Das?”
  “Scrifys ew òbma dr’era gweyth a routh-hysteria en scol an pluw de Lün eus passyes. Scol whei, martesen?”
  Ma 'gan broder Tristan ow wherhin.
  Dibegh ew agan semblans.
  “An flehes a dreylyas müscok ha thera anjei ow pònya oll adro dhe’n pras, pecar’a bestes gwyls. Sampel a scavellow cronek a veu kemerys dhort an gegin rag m’allens bos prevys. Divlasys veu an goges.
  ‘Nag eus tra veth drog gen ow boos vy,’ emedh hei. 'Treylya frantic a wrüg an flehes ken’ kidnyow!’”
  “Eus tra veth e’n artickel ’dro dhe gònines?”
  “Cònines? Whei 'gas diw a wör neppeth, my a hevel.”
   Ma Tristan ow wherhin arta. “Erow whei ow codha en myschew?” 
  “Thera lies cònin gwydn ow tos mes a hatt hir dha sira wydn. Anjei a veu chassyes gen an flehes.”
  Ma Tas ow hanaja, “Nag eus marth genam. Na wrüg an düs gowldevys gweles cònines veth; flehes en üdnek. Nag üjy tüs gowldevys ow qweles bès an peth en ’jei supposys dhe weles. Tho an cònines rag an lagajow flehes en üdnek.”
  “Bès o anjei gwiryonedh po a veu anjei tarosvadnow?” my a venja godhvos. 
  “Tòbm ha blewek o anjei, en kig ha knes.” emedh Rosa.
  Ma mir sevür dhe Das.
  “Diantel ew an hatt na. An nessa tro ev alja bos neppeth hackra avel cònines. Nei a dal daskemeres an hatt. Nei a res rei an hatt arta dhe’m dama wydn vy. Na dalvia dhen rei ev dhe biwa benag. Pe taclow erel a veu res dhe ves?”
  “Mantel dhû dha sira wydn.”
  “Ha dew olifans gwydn.”
  “Res ’vel royow gen Mabm Wydn? Pandr’ew leverys gen Henvam?”
  “Na wöra nei. Nag üjy hei ena na whath. Ma hei dres mor ha whithra hy bleujyow.”
  “Avorow my a vedn mos genow’ dhe gows dhe’m dama wòcky. Ma othom dhe nei a dowl m’allen nei cawas tre oll an taclow.”

Chaptra Üdnek: Henvam

  Otta nei! De Sadorn ew, ha theram ow mos, gen Tas ha Rosa, dhe dharas delergh chei Mabm Wydn. E'n pras gever ma mynnen nowydh, ha nei ell clowes nebonan ow lavürya en üdn shoppa. Ma Tas ow knackya war an daras.
  “Dewgh chi!” Lev agan Henvam ew. Benyn vian hag üthik coth ew Henvam, saw yonk ew hy lev. Sedhys ew hei en cador vrehek gen Mehal, an Gorgath Marthys, war hy fedndowlin. Ma dhedhy scòdhlen teg nowydh adro dh'y diwscodh. Onan gen Modrep Senara, theram ow sòppoja.
  "Henvam! Devedhys tre os ta."
  "Yn tiogel. Nyns esen pell alemma."
  "Saw chy a veu dres mor."
  "Ah! My a vynn y dhismygya treveth aral."
  "Fatla gen dha flourys?"
  "Riel dra. Tevys da yth yw an lavender. Ogas parys yw dhe vos cuntellys. Nessa termyn, Kettern ha Rosa, whi a yll mos genev. Whi a yll cuntel flourys rag gwil perfûm genev."
  Otta Mabm Wydn lebmyn. Ma hei ow tos chei gen fraylys a bernajow. Devedhys ew hei dhort an dre. 
  "Piw a venja cawas bolla' de? Ha ma pebys nebes byskys nowydh genam. Whei alja aga thastya."
  "Aljama cawas leth gever, mar pleg, Mamm Wynn?" 
  "Sugan flourys scawen raga vy, mar pleg, Mamm Wynn."
  “Ha boll' a de ragam a via pur dha, meur ras dhis, Mabm.”
  Pandra ’vedn Henvam eva?
  “My a wra cawas banna gwyn ew dres genam dhyworth Pow Frynk an myttin ma. My a dhros dowr tomm Frynk yn wedh, mes henna na vynnav eva ken kinnyow. Ha lemmyn, ma negis dhyn, dell grysav.” Pur sevur ew Henvam. 
  “Ple ma'n hatt ha mantel gour vy? Ple ma ow olifanses?”
  “An hatt a veu pernys gen Jory Curnow e'n fer an scol. An vantel ha’n olifanjes a veu pernys gen y dhama, Mestres Curnow. Ma dhedhy shoppa warow coth en Truru.”
  “Ytho, yma edhom dhyn ni a varhasna. Res yw dhyn dasprena pup tra - ha 'ga gorra arta y’n kist bras vy y’n soler. Petroc, ty a res agan lewya bys yn Truru dohajydh ma. Ha lemmyn, my a vynn cows gans ow mab gwynn bras. Usy ev y’n chi? Gwra y dhanvon dhymm.”
  Rag fra ’venja Henvam cows gen Tristan, agan broder? Me ’venja godhvos.

Chaptra Dewdhek: Shoppa Warow Coth

 Otta nei arta! Dohajedh ew, ha thera nei ow mos bys en Trurû e'n carr brâs Tas. Ma va ow lewya ha sedhys ew Henvam e'n sedha rag reb ev. Ma Henvam ow tos hy honan drefen nag üjy hei ow trestya dhe Vabm Wydn gwil puptra en own!
  Rosa ha my, sedhys o nei a-dhelergh gen Tristan, agan broder cottha, trehys y vregh. Na ell ev gwary rugby hedhyw. Ma othom dhodho a vos dhe'n leverva rag lever arbednek ew ragerhys ragto. Ha res ew Tas mos dhe'n gorvarhas dhe berna neppeth rag Mabm. Henvam, Rosa ha my? Thera nei ow helhya olifanjes gwydn!
 Ma routh veur e'n cita, drefen bos pedn an seythen. Scon, thera nei ow trouvya shoppa warow coth Mestres Curnow. Ma va en strêt ydn bian ogas dhe'n beneglos. Nag ew an strêt ma nevra pur vesy.
 Ma beister dewal ha bian lowr dhe'n shoppa. E'n veister ma oll sortow taclow: mebel, priweyth, gweder, tegednow, dilhas, daffar chei. Ma taclow ras ha taclow ker; taclow henwys 'atal' gen Mabm magata. Theram ow merkya olifans plastek en cornel.
 "Dumbo! My 'ell gweles Dumbo!" Rosa ell y weles ewedh.
 "Y'n gwettha prys, Rosa, nyns yw Dumbo mar a bris avel an olifans aral. Nyns yw Dumbo mar goth avel ow olifans gwrys a dhans olifans. Tanow lowr yw, drefen e dhe vos gwynn, mes nyns yw pur ger. Rosa, ty a yll prena Dumbo. Otta pymp peuns."
 Ma Rosa owth entra an gwerthjy. Wòja pols bian ma hei ow tos mes, saw heb olifans veth. Ma mir trûan dhedhy.
 "Rag fra nag eus an olifans genes?"
 "Mestres Curnow a reqwiryas hanter cans pens, drefen dhe vos üdnik. 'Nag ew liwys', medh hei."
 "Flows! Yth yw tanow lowr, mes nyns yw unnik. Flownen yw an venyn na. My a vynn y dhisqwedhes dhedhy! Gwrewgh gortos mynysen."
 Ma Henvam ow mos mes a wel en ôp. Nena ma benyn yonk, gweskys fin, ow tos mes. Ma dhedhy scòdhlen Henvam adro dh'y diwscodh ha ma hei ow tegy scrifsagh.
 "Henvam?"
 "Lemmyn my a vynn y dhisqwedhes dhedhy!" Lev Henvam ew whath.
 Ma hei ow mos a-jei, ha straft thew an veister leun a olifanjes gwydn. Oll an taclow war an stylednow ew olifanjes plastek gwydn pecar'a Dumbo. 
 Thera nei ow mires dres an veister ha Henvam ow cows gen Mestres Curnow. Ma hei ow kerdhes dhe'n veister ha kemeres olifans gwydn dhort an gornel. 
  Lebmyn ma hei ow kemeres olifans kehaval dhort estyl a-dhelergh dhe'n benk. Ma mir disconfortys ha müskegys dhe Vestres Curnow.
 Ma Henvam ow kemeres neppeth mes a’n scrifsagh. Ma hei ow scrifa nebes geryow war dabm paper ha, wòja hedna, gòrra deg pens e’n dorn Mestres Curnow. Lebmyn ma hei ow tos mes a’n shoppa, ow tegy dew olifans plastek gwydn.
 Straft ma Henvam ow mos mes a wel e'n ôp. Thera nei owth ervira dhe sewya a-dhelher, bès distowgh ma hei ow tos mes avel hy hònan – ha gen agan dew olifans còmpes et hy diwla. 
 Thera nei ow mires ort beister an shoppa. Nag eus olifans gwydn dhe vos gwelys ha whath ma mir müskegys war vejeth Mestres Curnow – ha deg pens et hy dorn.
 Ma lies qwestyon dhe Rosa ha dhebm.
 “Henvam! Chy a veu benyn yonk. Fatel a wrüss ta hedna?” 
 “Henvam! Chy a dreylyas oll an taclow e’n shoppa dhe olifanjes plastek. Fatel a wrüss ta hedna?”
 “Henvam! Rag fra a wrüss ta rei deg pens dhe Vestres Curnow? Hei a reqwiryas hanter cans pens rag Dumbo.”

Chaptra Terdhek: Disqwedhyans Henvam

 “An eyl wosa y gila, mar pleg! Yn kynsa le, na veu vy benyn yowynk, saw whi a’m gwelas avel benyn yowynk, ha Mestres Curnow a’m gwelas avel benyn yowynk, ynwedh. Hus yw.
 Nessa, treylya oll an taclow dhe olifansys gwynn ny wrugav. Ny wrussowgh whi percevya puptra marnas olifansys gwynn. Ha ny wrug Mestres Curnow gweles travyth marnas olifansys gwynn. My ’allsa gweles agan olifansys gwir. Ha wheg ov vy! Martesen flownen ha lader vo Mestres Curnow, saw nyns ov vy. Ny dal dhedhy kelly mona dhyworth an bargen.
 ‘A Vestres Curnow’ yn medhav, ‘My yw dhyworth Savonow Kenwerth. Yth esowgh whi ow qwertha nebes taclow cammdescrifys. An olifansys yn agas fenester, nyns yns i tanow, nyns yns i coth ha nyns yns i gwrys a dhans olifans. Yth yns i pur gemmyn ha gwrys a blastyk. Res yw dhymm kemeres dew anedhi rag samplow. My a wra ri aqwytyans dhywgh.” 
 My a scryblas neppyth war dokyn, mes my a worras deg peuns yn hy leuv. Hi a wrug predery bos an deg peuns an aqwytyans. Ny wra hi perthy cov a dravyth yn neb cas!
 Ha lemmyn y tal dhyn mos yn park kerry ha mettya gans agas sira ha Tristan.”

Chaptra Terdhek: Disqwedhyans Henvam

  “An eyl wosa y gila, mar pleg! Yn kynsa le, na veu vy benyn yowynk, saw whi a’m gwelas avel benyn yowynk, ha Mestres Curnow a’m gwelas avel benyn yowynk, ynwedh. Hus yw.
  Nessa, treylya oll an taclow dhe olifansys gwynn ny wrugav. Ny wrussowgh whi percevya puptra marnas olifansys gwynn. Ha ny wrug Mestres Curnow gweles travyth marnas olifansys gwynn. My ’allsa gweles agan olifansys gwir.
  Ha wheg ov vy! Martesen flownen ha lader vo Mestres Curnow, saw nyns ov vy. Ny dal dhedhy kelly mona dhyworth an bargen.
  ‘A Vestres Curnow’ yn medhav, ‘My yw dhyworth Savonow Kenwerth. Yth esowgh whi ow qwertha nebes taclow cammdescrifys. An olifansys yn agas fenester, nyns yns i tanow, nyns yns i coth ha nyns yns i gwrys a dhans olifans. Yth yns i pur gemmyn ha gwrys a blastyk. Res yw dhymm kemeres dew anedhi rag samplow. My a wra ri aqwytyans dhywgh.” 
  My a scryblas neppyth war dokyn, mes my a worras deg peuns yn hy leuv. Hi a wrug predery bos an deg peuns an aqwytyans. Ny wra hi perthy cov a dravyth yn neb cas!
  Ha lemmyn y tal dhynn mos yn park kerry ha mettya gans agas tas ha Tristan.”

Chaptra Peswardhek: Dasperna an Vantel

  De Sül ew hedhyw, ha Mabm Wydn ha Henvam a wra dos dh’agan chei rag debry kidnyow gena nei. Yar rôstys e’n vorn ew ow gwelha pres dhebm, saw na vedn Rosa debry kig – losowegores ew hei. Coges pur dha ew agan dama, saw nag ew hei mar dha avel Mabm Wydn. Coges varthys ew Mabm Wydn – pystriores e’n gegin!
  Wòja nei dhe dhebry agan pres, Mabm Wydn a vedn disqwedhes kisten a whegednow dhe nei. 
  “Pandr’ew an re na, Mabm Wydn?” my a venja godhvos. 
  “Whekow! 'Lokum' ew. An recît a dheuth dhyworth Babylon. Ma con ha bleus ettans, warbarth ha sugen limaval hag ow devnydh arbednek – dowr ros ow hònan.”
  Müscok ew Mabm Wydn. Nag eus telher henwys Babylon e’n eur ma, my ’wör. Bettegens, pur dha ew hy lokum. Ma whecter ha sawor spladn dhe dhowr ros.
  “Lemmyn,” emedh Henvam, “yma edhom dhyn a jynn amontya. Drustan, ty a res gweres dhymm. Yn shoppa Mestres Curnow my a welas argemmyn rag hy gwiasva. Neppyth nyns yw gwerthys y’n gwerthjy yma hi ow gwertha warlinen.” 
  Ma ’gan broder ow kerhes y gompûter barrlen.
  “A wress’ta gweles pandr’ew trigva hy gwiasva?” emedh Tristan.
  “My a’s gwelas, mes nyns eus cov dhymm anedhy! Re goth ov dhe berthy cov puptra.”
  “Oll y compòster. Gerow’ nei dhe ’saya e-Bay. Fatel ‘venjes ta pe an vantel? Eus acont PayPal dhis?”
  “Nag eus. Ny wonn vy pyth a via acont PayPal.”
  “Eus carten bank dhis, dhana?”
  “Nag eus. Nyns eus acont arhanty dhymm. Yth yw mona an myghtern!”
  “My a vedn pe,” emedh Tas, gen hanajen. “Bès nag ew kevys genes an vantel na whath.”
  Ma Tristan ow whilas war an compûter ha cavos clôk opera dû. An clôk ew haval dhe vantel Henvam. Martesen ev alja bos an keth tra poran.
  “Gwra y brena!” emedh Henvam. Endelha, an clôk opera ew pernys.

Chaptra Pemdhek: Daskemeres an Hatt

  Otta nei e’n scol de Lün, mettin a-varr, ha otta Jory. Ma mir trûedh dhodho.
  “Na vadna vy gwitha an hatt, na velha. Cas ewa genam.” Nag eus othom dhen a bejy an hatt, my a hevel. 
  “Rag fra na venta gwitha an hatt? Prag nag üjy va ow plêsya dhis?”
  “En kensa, an cònin a scappyas dhort y gisten, gans y dhens. Nessa, ev a dhebras toll e’n hatt, ha nena, lebmel etto.”
  “Martesen, dha gònin a venja metya gen y gothmans arta.” Kescolonednek ew Rosa dhe vestes. “Nag ew vas rag cònin bos y hònan oll.” 
  “Wòja hedna, na aljama y dedna mes arta. Tra veth na ellama tedna mes a’n hatt. Nag ew vas an hatt lebmyn.”
  “Martesen, an toll a dhegeas daras e’n hatt.”
  “Bettegens, nag ewa da genam. Na vadna vy y witha, na velha.”
  “Bès pe le ma va ? Üjy va whath en dha sagh?”
  “Òbma! Ottava! Kebmer an hager dra!”
  “Meur ras dhis, Jory. Ma edrek dhen nag ewa da genes. Bès agan Henvam a vedh lôwen gen cawas an hatt arta. Gwell ’vedha e’n termyn a-hes. Na dalvia Mabm Wydn y rei rag fer an scol. Hagensol, ma othom dhe Henvam a’n vantel dhû ha’n olifanjes gwydn. Crowsek ew Henvam gen Mabm Wydn.”
  “Na ’öra vy ple vo an vantel ha’n olifanjes. Anjei a veu gòrrys en neb telher gans ow dama. Martesen hei wra aga gwertha et hy shoppa taclow coth en Trurû.”
  “Thew hedna oll y compòster. Solabres, ma’n olifanjes dhen. Nei eth dhe werthjy dha dhama de Sadorn ha 'ga perna. Ha de, nei a bernas an vantel war e-Bay.”
  “Na wrüg hei leverel tra veth dhe vy. Na wressa whei pe showr a vòna, ma esperans dhebm.”
  “Tas a beas! Bès ma kisten a hygow hüs genen, dhort Henvam – ha pemp pens rag an hatt – oll rages ta.” Pur lôwen ew Jory gen y gisten ha’n mòna. Ma va ow wherhin.
  “Lebmyn my 'ell gwil pratt war ow dama, martesen!”

Chaptra Whetek: An Vantel Gabm

  Heb perthyans o nei dhe weles an vantel. Ma lies qwestyon dhen. Pe le ma hei? Ew hei an vantel own? A wra hei dos hedhyw? Na wrüg hei dos de Lün. Nei a bònyas tre wòja scol, ha na veu traveth ena. Na wrüg hei dos de Meurh naneyl. Na wrüg hei dos de. Ma esperans dhen del vedh hedhyw an jedh. Bès, martesen, na vedh chons dhe nei.
  Nag eus post ken scol, etho res ew dhen gòrtos. Otta nei lebmyn. De Yow ew, ha thera nei e’n scol arta. 
  “Ha Kettern! Ha Rosa!” Ma Jory òbma ewedh. “My a welas agas mantel de, thera vy ’crejy. My a veu e’n shoppa Mabm newher, ha my a welas mantel e’n rom bian a-dhelher dhe’n shoppa. An keth mantel my a welas en fer an scol. Ma hei ow cregy war gledhren gen hendhillas erel.”
  Ew Jory còmpes? Ew ev cabmdybys? Pur hir ew an jedh terebo pres mos tre. Res ew dhen leverel an nowodhow dhe Henvam. Pana vantel a veu pernys genen war wiasva nebonan? Heb perthyans o nei. Thera nei ow fistena tre wòja scol, heb gwary gen ’gan cothmans.
  “Mabm! Mabm! Eus fardel whath?”
  “Entei. Ma fardel, saw ma va en chei Mabm Wydn. Kewgh! Bès dewgh tre rag kidnyow, whegh ar glogh.”
  Thera nei ow pònya mar üskis dr’ellen nei, dredh pras, dres an gwedh, dres treven e’n lowarth. Nag eus termyn lowr dhe cherya an gever. Ha piw ew an den na e’n shoppa? Nag eus termyn rag dismygya.
  “Henvam! Henvam! Eus fardel?” Ma’n fardel war an bord e’n gegin. Nag ewa egerys whath. Ma gweljow dhe Mabm Wydn.
  “Gwra ygery an fardel,” medh Henvam.
  Thera nei ow mires orth agan dama wydn ha hei dhe drehy an gorden. Egerys ew an fardel. Mantel dhû ew, devry, gwres a gwlân ha gen ispan owrlyn rüdh. Brâster, gis ha liw ew pecar ha’n vantel agan hendas. Saw nag ew hei an keth onan. Nowydh ew an vantel ma. Coth ew agan mantel. Nag ew Jory myskemerys.
  “Ma ’gan mantel nei whath e’n shoppa warow coth en Trurû,” e’medh Rosa. “Fatel ellen nei keschânjya an dhiw?”
  “Henn yw ober rag dy Sadorn,” emedh Henvam. “Termyn yw rag troyl aral bys yn Trurû.”

Chaptra Seytek: An Shoppa Warow Coth Arta

  Endelha, de Sadorn e’n mettin, thera nei ow mos arta dhe Trurû en carr Tas. Eneth arta, ma Tas ow lewya ha thew Henvam esedhys e’n esedh arag. Nag üjy hei ow tegy hy scòdhlen. Ma Rosa ha my ow sedha a-dhelher. E’n tor’ ma, ma ’gan broder Tristan ow còrtos tre.
  Henvam, Tas, Rosa ha my, nei oll a venja whilas an vantel goth. Ma’n vantel nowydh, an vantel gabm, en sagh Henvam. Ma towl dhe nei. Towl da? Na ’öra vy.
  Nag ew an gewer pur dha. Ma hei ow cül glaw. Ma Tas ow parkya an carr ogas dhe’n peneglos, ha thera nei ow kerdhes en üskis dhe shoppa Mestres Curnow. Tewl ha gleb ew an veister gen glawednow. 
  Ma nebes pernoryon ow perna gweder mires brâs. My ell gweles Jory e’n shoppa gans y dhama. Theram ow qweles ewedh y gisten a hygow hüdel en cornel, keffres ha neppeth aral. Martesen Jory a ell rendra didreylyans raga nei.
  Ha Mestres Curnow ow wrappya an mirour rag hy fernoryon ma Tas ow whithra argh gweder leun a dhelkow, armels ha brôchys. Martesen ev a vedn perna ro rag Mabm.
  Ma Henvam ow tarya ogas dhe dharas an rom delergh. Ma Rosa ha my ow kesclappya gen Jory en levow isel. Ma va ow tisqwedhes dhe nei hygow cartednow, bès my a venja godhvos pandr’ew an dra aral e’n gornel.
  “Me eth dhe’n varhas,” emèdh Jory, “ha my a bernas logojen wydn en le an cònin gwydn.”
  “Üjy dha dhama owth alowa hedna?”
  “Nag üjy hei godhvos anodho na whath.”
  “Ellama gweles dha logojen?” a venja Rosa. Bestes ew da genjy.
  Ma’n bernoryon ow tibertha.
  “My a venja perna an delk na,” emèdh Tas. “'Aljama mires moy nes? Pandr’ew agas pris a’n gwelha?” Ma attendyans Mestres Kernow dhodho, bès terweythyow ma hei ow mires adro. Martesen hei a alja gweles Henvam ha hei dhe entra an rom delergh. Bès ma Jory ow mos dhe’n gornel rag cawas y gisten vian.
  “Jowl! Nag üjy hei obma.” Grevys ew Jory. “Ow logojen a fias dhe'n fo!”
  “Logojen!” Ma scovornow Mestres Curnow ow cachya an ger. Bestes nag ew da genjy. Ma hei ow fesky war-tû ha Jory. 
  “Pana logojen ew hedna?” Thew keyn Mestres Curnow treylyes. Na ell hei gweles Henvam. Nag üjy Henvam ow kemeres marnas nebes secòndys dhe sleppya e’n rom delergh ha dhe dhos mes arta. Ma mir plesys dhedhy. Ma hei ow tava hy sagh ha plynchya ortam.
  “Ges ew!” Ma Jory ow wherhin. “Nag eus logojen veth.”
  Ma y dhama ow treylya arta war-tû ha Tas. Nebes crowsek ew hei.
  “Deg pens warn ügens,” emèdh hei.
  “Pemp pens warn ügens,” ma Tas ow profya.
  “Degemeradow!” Nag ew hei mar growsek lebmyn.
  Gans hedna ma Tas ow perna an delk ha thera nei ow mos mes a’n shoppa. Ma Jory ow tos dhe’n daras genen.
  “Ro dhymm dha leuv,” emèdh Henvam. Ma mir sowdhenys dhe Jory, bès bettegens ma va owth ystyna y dhorn. Ma Henvam ow còrra logojen wydn etto.
  “Pe le ...?” ma Jory ow tallath gofyn.
  “Yn pocket a’n vantel goth,” ew an gorthyp. “Gwith warnedhy gans rach.”

Chaptra Etek: Fav

Whath ma’n losow fav bian dhort fer an scol et aga fottys bian. Ma othom dhodhans a spas moy. Theram ow mos dhe jei Mabm Wydn. Ma Rosa ow mos genam bys en pras an gever, ha nena ma hei ow crowdra rag gwary gen an bestes. Ma Mabm Wydn ow mires orth an plansow.

“Bian lowr ens!” emedh hei. “Bès na amownt! Chy ell cawas radn ow lowarth vy. Dor da ew. Nei ell gònis dha blansow, ha rei dhodhans tabm teyl gever. Gen kerenja ha gwith an losow a wra tevy brâssa. Martesen e vedh nebes fav dhis rag kesstrivya e’n sho agan treveglos.”

“Nag eus termyn lowr rag hedna. Na alja anjei cressya mar üskis,” medham. “Saw da via genam cawas nebes fav dhe dhebry.”

Lebmyn, ma Mabm Wydn ow tisqwedhes dhebm splatt a dir da, en telher howlyek, a-dhelher dhe grow an gever. Etho, otta vy ow palas, tedna an whedn ha lesa kelornas a deyl. Nessa, ma othom dhebm a drouvya neppeth dhe wil fram ûhel. Ma Mabm Wydn ow tisqwedhes dhebm pil a bredn trehys, ha theram ow towis pemp a’n hirra gwelydny, dhe wil wigwam. Wotiwedh, theram ow còrra ow flansow fav bian e’n dor, reb an pemp gwelen.

“Otta cadna dowrhe,” emedh Mabm Wydn. “Res ew dhis dowrhe dha blansow. Ma dowr glaw e’n balyer glaw. Ha gwra dos pub dedh wòja scol.”

Etho, pub jorna wòja scol theram ow mos dhe lowarth bian vy rag gòrra with a’n losow ha mires orth aga thevyans. En crow Mabm Wydn thera vy ow trouvya botel gen tokyn “Tev-Moy”, etho thera vy ort y addya dhe dhowr rag ow losow vy.

En üdn seythen cramblys ens dhe vleynyow an gwelydny, ha mons ow tascor lies bleujen rüdh wheg, kerys gen gwenen Henvam. Wòja hebma ma’n còthow fav ow tevy. En kensa, münys ens, bès üdn veusva en hirder. Pub dedh thens hirra. War-bydn sho an drev, hirra vel ow scantlin scol ew lies anodhans.

Ma lies faven; re a fav. Thera vy ow terry canstelas anodhans rag Mabm. Ha whath ma lies faven. Otta vy ow rei canstelas anodhans dhe Vabm Wydn. Whath ma maga lies der kens hebma, dell hevel dhebm.

“Pe lies eus othom dhebm rag an sho?” theram ow cofen orth Mabm Wydn.

“Ema othom dhis a guntel teyr faven. Anjei a dal bos criv ha còmpes, an keth mens, ha na re goth. Na dal bos has veth dhe vos gwelys ettans.”

Thera vy ow terry teyr faven.

“Tabm cabm ew hedna,” emedh Mabm Wydn, “ha nag ew an garednow kehes.”

“Tabm denty!” medham.

“Mar menta gwaynya, res ew dhis bos denty.”

Theram ow terry fav moy, ha lebmyn thera nei ow tewis an gwelha, teyr anodhans. Theram ort aga folsya gen padn glan ha lebmyn parys ens rag an kesstrif.

Chaptra Nawnjek: Sho Agan Treveglos

De Sadorn ha jorna spladn ew. Ma ’gan teylû (oll marnas Henvam) ow mos warbarth dhe Gresen Gemeneth e’n dreveglos. E’n park ma nebes tyldys gwydn. En tylda bian ma bagas mûsek ow seny Trelawny ha canow Kernôwek hengovek erel. Thera nei oll ow kemeres taclow dhe’n tylda brâs. Anjei a vedh jujys en kesstrivow. Ma Mestres Penrose ow checkya an scrivednow entra. Res ew dhen pe hanter cans diner rag pub offryn.

Settys ew ow scüdel gwydn, gen an teyr faven deg, war üdn bord. Fav ew tevys gen an gevellyon Penrose ewedh, saw brâssa ha moy gòmpes ew an re vy. Ma lies bord. Ma keniver class war vord diberthys. Nebes whegednow ew dres gen Mabm Wydn, en bolla gwydn. Nag ew an ger “lokum” convedhys gen nagonan, rag hedna henwys ens “Delît Turkek” genjy. Pyctur a ’gan cath ew lymnys gen Mabm. Tecka ew an gath nei avel “Mehal Marthys” Henvam. Patron a jynnjy ew gwres gen Rosa - gen tos. Geryow ew scrifys gen Tristan war nebes paper arbednek. Na aljama aga convedhes. “Laten ens,” emedh ev.

Nag eus tra veth gwres gen Tas. Ma va ow jujya an comparyans fotograffy. Degëys ew an tylda brâs rag hanter our ha’n jujys ow jujya oll an classow meyny ha jarnek, ha’n classow artys ha creftys. Lebmyn ma’n bobel ell mires ort oll an taclow. Ma cartednow owr dhe’n gwaynyoryon, ha ma cartednow arhans dhe’n re nessa.

Ma’n pictour Mabm ha’n scrif Tristan ow cawas cartednow owr. Serrys ew Rosa drefen nag üjy hei ow qwaynya tra veth rag hy jynnjy tos. Ha my ow hònan? Ma marth genam nag era vy ow qwaynya owr. Nag eus bes carten arhans dhebm. Piw üjy ow qwaynya owr rag aga fav? Dhe’n gevellyon Penrose an vyctory! Yonca ha moy las ew aga fav anjei.

Ha Mabm Wydn? Ma powas arbednek dhedhy rag hy whekow: offryn an gwelha e’n sho. Ma debrys gen an jujys oll an re e’n bolla, bes, en gwelha pres, ma dhen kisten aral anodhans en chei.

Thera nei ow mos tre ha debry anjei.

Chaptra Ügens: Re a Fav

De Sül ew. Thera nei ow tebry fav rag kidnyow. E vedh fav rag con. Fav ew res genen dhe 'gan kentrevogyon. Rewys ew lies faven gans agan dama rag an gwav.

"En hav per co gwav!" medh hei.

Ha whath ma'n plansow fav ow cressya ha drei rag fav moy. Ma fav ow tallath bos blewek. Ma Rosa ow croffolas, “Na vadna vy nevra debry üdn faven moy!”

E’n dohajedh ma nebonan ow knackya war an daras. “Piw ew hedna?” me a venja godhvos.

Gwithyades gres ew. Aswonys ew hei dhe’m Tas.

“Mester Trewhella, na ellama gweles nagonan en nessa chei. Res ew dhebm cows ganjans. Croffolyow ew recevys gena nei dhort an ayrbark. Ma gwern pur hir e’n lowarth. Peryl ewa rag ayrplaynys ha tüs ow crog bargesy. Res pòrres ew, ev a res mos.”

“Ow dama ha dama wydn ew dres mor. Me a vedn gorra an gwern dhe ves,” emedh Tas.

Ma'n withyades gres ow lewya dhe ves et hy harr – ha thera nei oll ow pònya bys en lowarth Mabm Wydn.

A-dhelher dhe’n crow an gever nei ell gweles ow losow fav. An pemp garen ew nedhys warbarth, dhe wil an gwern tew. Pur dew ew ha pur, pur ûhel. Na ellen nei gweles an topp.

“Lowr a fav!” e medh Tas. “Bes fatel ellama y drehy dhe’n dor heb destria agan treven? Ma othom dhen a’y lehe! Pandr’eus e’n crow? Eus whennladh, martesen?”

"Ma dew votel e’n crow Mabm Wydn,” medham, “an eyl henwys ‘Tev-Moy’ hag y gila henwys ‘Tev-Le’.”

“Ha chy a ûsyas an ‘Tev-Moy’ war dha fav, theram ow pedery."

Diskevrys - shamys o vy! Thera vy ow cawas an botel bian dhort an crow.

“Kebmer with!” Tas a lavar. “Na wra lagya an lin war dha grohen. Chy alja lehe dha hònan!” Pur war o vy ha my ow tivera an lin en dowr rag ow losow cawrek. Na vadna vy lehe ow hònan.

“Eus othom dhebm a wòrra an dowr war an dor, war an garednow po war dhel?” me a vedn godhvos.

“Na wöra vy. Gwra saya oll an trei.”

Tho nei oll nebes ownek ha nei ow còrtos. Ma’n losow ow talla treylya melyn. En kensa, segh ha cabmys ew an delkyow. Nessa, mons ow codha en cowas a dhoust. Wòja hebma, ma’n garednow ow cryhy. Mons ow tallath bagla.

“Gwrewgh sevel dhe-ves!” Tas a lavar dhe bubonan. “Anjei a wra codha.”

Saw nag üjy anjei ow codha wara nei. Mons ow sedha pecar’a torgh a lovan. Nenna mons ow treylya dhe bodn ewedh.

“Problem digelmys,” emedh Tas, “Bes, Kettern, difednys os ta ort entra e’n crow dha dhama wydn arta.”

Chaptra Onan warn Ügens: An Crow Gever

Otta nei a sav adhelher dhe’n crow gever. Thera nei ow mires ort bern bian a dhoust, an remenat a hûjes losow fav.

“Diantel ew dha bastel a dhor lebmyn,” emedh Tas. “Ma othom dhen a’y dhiberhe gen lovan - ha gòrra emann sin brâs. My a vedn whilas lovan e’n carrjy.”

“Pe le ma Mabm Wydn ha Henvam?” Rosa a venja godhvos. “Chy a lavaras, ‘Tramor ema an dhama ha’n dhama wydn’. Bes thera Mabm Wydn òbma de. Hei eth dhe’n sho agan treveglos gena nei ha gwaynya powas ‘an gwelha en sho’.”

“Ha na woya nei dr’era anjei ow mos neb le. Na wrüg nagonan leverel tra veth dhe nei,” theram ow croffolas. “Henvam a lavar dr’ellen nei mos en Pow Frenk genjy - bes gellys ew hei solabres.”

“Fatel wrüg anjei mos? Wrüg anjei mos gen keybal Breten Vian? Po a wrüss ta aga gorra dhe ayrborth Tewyn Plustry gen carr?”

“Na wrüg anjei mos gen keybal, ha na wrüga vy aga lewya dhe’n ayrborth. Anjei a wrüg mos der an crow gever. Ha whei ell mos dy ewedh.”

Thera vy ow mires orth Rosa ha ma Rosa ow mires ortha vy. Taclow astranj ew leverys et agan teylû. Bettegens, nag üjy Tristan ow kemeres marth, my a hevel.

“Nag eus passport genam,” emedh Rosa.

“Na amownt. Nag eus othom dhen anodhans.”

Thera nei ow kerdhes dhe dharas rag an crow. Egor ew ev rag an gever. Nag eus tra veth etto marnas cala war an leur ha clôs gora war an vos delher. Ma’n gever a-ves e’n pras.

“Pub hüny a-jei!” emedh Tas. Thera nei ow mos a-jei ha ma va ow keas an daras. Tewal ew. “Whei a res keas an daras-ma pub termyn, ken mos mes a’n daras delher!”

Pana dharas delher? Otta nei bedn vos delher an crow, ha nag eus daras veth òbma. Ma Tas ow herdhya an clôs gora ha ma radn an vos owth egery avel daras. A-ves ema gwel pur vrâs, gen lies rew a brysk isel purpur. Teg marthys ew an sawor.

“Lavender!” emedh Rosa. “Thera vy ow cara lavender ettien!”

“Mowns òbma,” emedh Tas, “rag overweles cuntel an flourys. Ma dha Henvam ow kil perfûm.” Ma Mabm Wydn ha Henvam ow kerdhes dres an gwel, gen den üjy o leverel gow dhe’n Tas.

“Salve Marce,” medh Tristan. Apert ew, aswonys ew an den ganjo.

“Pow Frenk a’gas dynnargh!” medh Henvam. “My a vynsa komendya dhywgh agas Gorewnter Marcus.

Chaptra Dew warn Ügens: Gorownter Marcus

Howlleskys ew an den, ha cottha ew ev ages agan Tas, my a hevel. Anketh ew y dhilhas.

“Rag fra nag eus lavrek dhodho?” emèdh Rosa.

“Na vedhes discortes!” emèdham. Bes nag üjy an den ow convedhes, my a hevel, poken nag üjy va ow cosowes. Ma va whath ow minwherhin.

Ma va ow mires troha’n daras, gerys egor gena vy, ha pedndroppya dhe’n Tas. Ma Tas ow keas an daras.

“Na wrewgh nevra gara an daras ma egor.”

Thera vy owth ystyna ow dorn ha leverel, “Salve, Marce!” pecar’a Tristan. Ma Marcus owth ystyna y dhorn ewedh. “Salve, puellula!” Na ellama convedhes an geryow, bes nag ew ev anwheg.

“Nag o vy henwys Puellula. Kettern henwys o vy.”

Ma Tristan ow tismygya, “Ma va ow clappya Laten. Puellula ew mos vian. Nag üjy Ownter Marcus ow clappya Kernôwek. Thera vy ow tesky Laten ow honan, mala vy gweres dhodho.”

"Bes, thera nei en Pow Frenk," emedh Rosa dadn whistra. "Rag fra nag era nei ow clappya Frenkek? Nei a wör clappya Frenkek. Agan dama ew Frenkes."

Ma Tas ow presentya an den. “Kettern ha Rosa, hemm ew agas Gorownter Marcus. Nena, “Ecce Kettern! Ecce Rosa!” Ma’n den ow plegy dhe nei.

Ma Tristan ow treylya raga nei. “Ma va ow leverel ‘Otta Kettern ha otta Rosa’.”

Ma Henvam ow wherhin. “Ha nyns eus edhom dhodho a lavrek. Tomm yw an gewer. Nyns usi tus Roman ow tegi lavrek en awel deg.”

Theram ow mires ort Rosa. Ma hei ow qwynkya. Müscok ew agan teylû!

“Rag fra ma Gorownter Marcus òbma? Üjy va ow lavürya òbma? Pandr’üjy va ow kil? Pandr’ew y whel?”

“Yma ef ow konys an lavant rag ow ethen vy, hag yma ev ow kul an botelow gweder rago yn wedh, y’n joppa na,” emedh Henvam.

“Oll ganjo y hònan?”

“Nan ti. Yma ugens den ha benyn y’n perhenogeth ma. Yth yw Marcus an chif,” ma Henvam ow tismygya.

My a venja gweles an weythva. Pandr’eus etto. Fatel alja nebonan gwil botlow en shoppa? Botlow ew pernys, anan?

Pur vrâs ew an shoppa, pecar’a skiber. Ma treth ha bleus loos en arhow, keffres ha canstellow leun a lavender. Ma bern a reden, ewedh. En cornel ma hûjes vorn, saw yeyn ew hei.

“Yma ef ow kul botellow yn gwav, ha lemmyn yth yw hav,” medh Henvam.

E’n cres an shoppa ma oll sortow taclow gwres a gober: cylinders brâs ha lies pib.

“Yth yw an re ma dhe gerhes an oyl essensek,” emedh Henvam

Distowgh, ma fôn Tas ow seny et y bocket.

“Ah!” emèdh ev. “Pres ew mos tre rag te ha tesednow.”

Chaptra Trei warn Ügens: Visyt Ownter Matty

“A’n our,” emedh Tas. Ma va ow còrra y glappcodh war an bord.

“Ma ’gas Ownter Matty ow tos dhe ôstya genen nebes dedh.”

Hemm ew an jedh wòja nei dhe vetya gen Gorownter Marcus. Ma Rosa ha my ow mires an eyl orth hy gila. Ownter Matty? Piw ew Ownter Matty?

“Es ta ow menya Ownter Marcus?” emedh Rosa.

“Rag fra nag ew Ownter Matty gwelys genen kens lebmyn?” my a venja godhvos.

“Nag erama ow menya Ownter Marcus. Matty a veu dres an mor termyn hir.”

“Marner ew e, dhana?”

“Piw ew ev an broder anodho, en neb vorr? Ha piw ew Marcus, ewedh?”

“Pe le ma y jei pa vedh tre?” Thera nei ow plagya agan sira gen lies qwestyon.

“Matty ew ow broder, agas ownter. Ma trei flogh dhe Vabm Wydn. An cottha ew Matty. My ew an nessa ha Modrep Senara ew an tryja. Senara ew an yonca. Hagensol, Marcus, ’gas gorownter, ew ownter Matty ha my. Hanter broder Mabm Wydn ew ev, mab Henvam.Trigys ew Matty war y lester-gwary brâs. Ma dhodho telher kelmy e’n heyl Dowr Fala. Nag ew da ganjo triga war dir. Gwell ew ganjo bos war an mor.”

“Peseul a flehes eus dhe Henvam?”

“Na wörama. Ma Marcus ha ma Mabm Wydn. Martesen y veu erel. Nag üjy hei ow leverel war anjei.”

“Fatel ell Ownter Matty dendyl y vownas war an mor?”

“Marner ew e, dhana,” theram ow coven arta, “po pescador?”

“Morlader, martesen. Bucanyer?”, ma Rosa ow treylya gòcky.

“Canor ajwonys ew ev. Ma va ow kil sonscrifow ha gwertha anjei a veur a vòna.”

Thera nei ow clowes son. Carr ew. Devedhys ew Ownter Matty. Mall ew genam gweles an ownter kevrinek ma.

Ma Tas owth egor an daras. Marth ew genen, Rosa ha my. Nag ew an den hir pecar’a Tas. Nag eus othom dhen a vires emann dhe weles y vejeth. Ma va en cador ros ha qwethys ew y dhiwarr dre ledn.

Chaptra Pajar warn Ügens: Cuntellyans Teylû

“Barbarossa!” Ma Rosa ow clappya dadn whistra, “Ma barv roos dhodho. Morlader ew ev.”

“Ha Bro!” emedh Tas. “Welcòm! Pur welcòm os ta.”

Ma Ownter Matty ow crysla. “Durda dhis, a Vroder Bian.”

“Tristan. Mosy. Pyjy kewgh dhe’n carr Matty ha kerhes y seher.”

“Ha ma canstel a vrilly, ewedh, cachys hedhyw vettin.”

An carr Ownter Matty ew bian, rowlys dre dorn ha gen sawor a besk. Thera nei ow tismygya ev alja bos pescador radn-dermyn.

Thera nei ow mos chei gen y seher, bes nag üjy va òbma. Gwag ew y gador ros.

“Pe le ma va?” nei a venja godhvos.

“Ma va e’n gowas.”

An nessa teken ogastei, ma ’gan ownter ow tos e’n esedhva. Ma va ow kerdhes.

“Henn ew gwell!” medh ev.

Ma dhodho mir normal warbarth, hir ha howlleskys. Maga hir ew ev avel Tas ha maga howlleskys avel Gorownter Marcus.

“Nag eus holan moy. Lebmyn ma dhebm ow garrow tir. A venjow oll clowes ow sonscrif nowydh?” ma va ow cofen orta nei. “Eus gramofôn po neppeth e’n chei, a Vroder Bian?”

“Deus òbma dhe’m jynn amontya,” emedh Tas. Ha scon ma cân ow seny.

Ma Mabm ow tos e’n rom. “Ton wheg ew hedna. Ow whei oll parrys rag kidnyow? Fyttys ew genam an pesk, ha Mabm Wydn ha Henvam a vedh òbma en scon.”

En stevel dhebry ma bord kenewal pur goth ha pur hir, gwres a bredn corys dû. Gwres ew an bord a radn gwreck coth ha settyes ewa gen kellyl ha vergh. Adro dhe’n bord ma naw chayr kenewal ha chayr hir flogh.

Ma son dhort an daras dhelergh. Theram ow clowas lev Mabm Wydn. Pana marth! Mabm Wydn ha Henvam ew, ha Gorownter Marcus magata.

“Salve!” Soweth. Anjei oll a wra clappya Laten arta ha na wra vy convedhes ger.

“Na borth awher!” emedh Mabm Wydn ha hei ow qweles ow mir. “Nei a wra clappya Kernôwek rages.”

E’n polj ma, ma crei dhort an gegin. Mabm!

“An cathes drog na! Ledrys ew ganjans kidnyow nebonan.” Ma Rosa ha my ow pònya dhe’n gegin. Ma cath nei ha Mehal Marthys dadn an bord warbarth. Mons ow tebry onan a’n brilly Ownter Matty.

“Na fors,” ma Ownter Matty ow leverel. “Lôwen o vy dhe dhebry pesk criv.”

“Oll en compòster ew,” emedh Mabm. “My a fittyas moy es othom dhen, en neb cas. Ma lowr whath.”

Herdhys ew an cathes mes a’n daras, ha thera nei ow mos, heb hockya, dhe dhebry agan kidnyow. Ma deg ahana nei ow sedha dhe vord: pajar henedh – Henvam, Mabm Wydn ha’y hanter-broder, Tas ha Mabm ha broder Tas, ha pajar flogh.

Thera nei ow tebry an brilly Ownter Matty warbar’ha losow debry gonethys gen Mabm et hy erber. Thera nei ow cosôwes orth mûsik Ownter Matty, ewedh. Pur lôwen o nei.

Wòja nei dhe dhebry, thera nei ow sedha e’n esedhva. Ma piano enny ha Mabm wör y seny et ta. Tonow Ownter Matty ew clowys genjy, ha hei ell aga seny. Ma hei ow seny tonow erel ewedh. Thera nei ow cana nebes canow ew godhvedhys genen. Da ew genen cana warbarth.

Kenth ew üdn gân nowydh. Etho, thera nei ow cessya cana, marnas Matty. Ma y lev ow seny mes. Pur deg ew.

Dhesempis ma’n mûsik piano ow cessya. Thera nei oll ow mires ort Mabm. Heb gwayans ew hy diwla, ha posys war rag ew hy fedn.

En còsk down ew agan dama!

Chaptra Pemp warn Ügens: Cana Warbarth

Ma üdn ronk ow scappya dhort Mabm, ha distowgh ma Ownter Matty ow sevel orth càna. En scon, ma Mabm ow tifüna, nebes sowdhenys.

“Gwell ew càna warbarth,” ma Tas ow wherhin. Endelha, thera nei ow càna warbarth, oll an cànow ew aswonys dhe nei. Ha nag üjy Mabm ow codha en còsk arta.

Theram ow coven ow hònan rag fra Mabm a gòscas ha Ownter Matty ow càna. Me a venja godhvos. Eus nebes arbednek en lev agan ownter? Ewa deffrans orth ow lev vy? Nag üjy Mabm longya dhe gòsca ha my ow càna.

Na vadna vy gofyn orth Tas lebmyn, rag hedna theram ow còrtos terebo termyn gwely.

“Rag fra a wrüg Mabm codha en còsk? Eus lev arbednek dhe Ownter Matty? Ev a dheuth en cador ros. Rag fra? Prag na wrüg ev còrtos et y gador ros?”

“Hanter morwas ew ow broder Matty. Ma’n mor holanek ow rei lost dhodho, heweres rag neyja bes nag ew vas rag kerdhes. Ev a dheuth en cador ros rag an very reson na. Ma othom dhodho dhe wolhy dhe ves an holan rag dascavos y arrow. Ev ell hüsa gosôworyon gans y lev, haval dhe oll morbobel. Syslys ha tanowhes ew an hüs en sonscrifow ha mesk levow erel.”

“Bes nag era nei ow còsca pecar’a Mabm. Rag fra na?”

“Drefen ma mor et agan gooj agan honan, ewedh!”

Chaptra Whegh warn Ügens: Heb Bos Gelwys

Wòja cana warbarth gen agan teylû en gordhûher, na vedn Rosa ha my mos dhe’n gwely, bes otta nei et agan chambour. Solabres thew agan broder bian, Arthòr, en còsk down e’n nessa rom. Crowsek o nei, drefen bos agan broder brâs, Tristan, whath gen an devesygyon. Nei ell clowes anjei e’n esedhva, oll ow clappya ha gwary sonscrifow.

Thera nei ow kesclappya en cosel dro dhe’n wharvosow nowydh. Heb wow, ma dhen teylû pur goynt. Piw ew an moyha coynt?

Ma dhen üdn gorownter ow qwisca pecar’a Roman ha clappya Laten. Ma Gorownter Marcus ow qweres dh’ y dhama tevy lavender ha gwil botlow perfûm. Nei ell omweles warnodho der crow an gever.

Ma morwas dhe nei rag ownter. Trigys ew Ownter Matty war lester-gwary, ha terweythyow ma lost dhodho. (Na wrüga nei gweles hedna, drefen bos cüdhys gen ledn.) Ma va ow tendyl y vôwnas gen recordya canow. Na ell ev cana derag presens an bobel, drefen tüs dhe godha en còsk (ader y deylû ev).

Scant na ellen nei remembra gweles agan Modrep Senara. Fashionista ew hei ha cowethes agan dama, saw pur vesy ew hei pub termyn.

Ma ’gan dama wydn ow laul taclow müscok ha gwil whegow marthys. Plansow ew câwsys dhe devy po dhe lehe gen nebes linyow et hy crow lowarth.

Ma gever ha cath pur goth dhe Henvam, ha hei ell câwsya tüs dhe weles taclow cabmdybys.

Agan dyhok a veu hüdor an wariva, gen hatt hir hüs ha mantel dhû.

Na whath, bys lebmyn ma ’gan kerens ow hevely pur normal!

Gordhûher teg ew, ha nag ew pur dewal whath. Nei ell clowas levow medhow war an vorr, ow tos an mena war nans. Ma tavern awarra war an mena. Menowgh lowr thera nei ow clowes pobel drosüs ow tremena. Saw nag üjy an levow ma ow tremena. Mons ow mos e'n lowarth Mabm Wydn.

Thera nei ow sevel emann mes an gwely ha mires der an veister. Nei ell gweles dew dhen yonk. Pur vedhow ens. Mons ow trebüchya oll adro ha wherhin. Soweth! Ma onan anodhans ow wheja en prysken. Üthyk!

Bes mons ow mos a-dhelergh dhe grow an gever, dhe’n splat fav. Ria! An dor na ew diantel whath. Ma gwarnyans, bes wra anjei y verkya?

“Üskis! Gerowgh nei dhe weles!”

“Nei a dal gwarnya an devesygyon?”

“Na!”

Thera nei ’h omwisca et agan gonow chei ha skichow ha mos war wòles. Thera an devesygyon ow cowsel ha wherhin. Thera nei ow slynkya reb aga daras ha mes an chei.

Thera nei ow kemeres agan vorr ûsadow dhe’n crow gever. Whath ma üdn den ow cül meur a dros, ow wherhin pecar’a müscogyon.

“Diantel! Martesen ma bòbm encledhys – po byjyon. Kebmer with lebma chy dhe stankya!”

Distowgh, mons ow tallath üja. Nena oll ew cosel. Ma son bian coynt ow tos dhort adhelher dhe’n crow. Ma Rosa ha my ow pònya bys dhe vin an dor diantel.

Ma üdn den yonk a y sav - serth ha heb gwaya. Ownekhes. Ma va ow lagatta orth an den aral. Ma’n den na ow pònya ader dro - saw nag ew y hirder bes deg misva. Distowgh, ma va ow merkya nei. Ma va ow tallath pònya war tûa’n vorr.

Nessa, war üdn labm, dhort telher vyth, ma gorgath Henvam owth apperya. Thera nei oll owth üja. Ma va ow sesya an den bian et y anow ha pònya dhe ves troha’n chei nei.

Ma Rosa ow creia. “Cath da! Cath wheg! Cosel ha teg, Mehal! Gwra y esgara! Gas y dhe godha! Na dal chy y dhebry.”

“Gwra sewya an gath na!” theram ow carma et y helhya.

Thera vy ow sewya an gorgath. Ma Rosa owth ow sewya. Ma’n den yonk ow ’gan sewya. Ma’n gorgath ow tegy an den bian der an daras rag egor.

Chaptra Seyth warn Ugens: Na Wrewgh Eva Re

Ma Rosa ha my ow fesky e’n esedhva a-dhelher dhe’n gorgath. Sewys o nei gen an den yonk.

“Pandr’ew hebma?” emedh Tas hag an gorgath ow pònya dresto.

Ma’n gorgath ow pònya dhe Henvam ha gara an den bian dhe godha war an strel reb hy threys, ken lebmel war hy barrlen. Ro bian rag Henvam!

“Gwrewgh sedha dor, pub huny,” ma Henvam ow comondya. “Kan, Mathaw, mar pleg.”

Ma Ownter Matty ow càna en cosel, ha straft ma ’gan dama ow codha en còsk et hy hadorvrehek, ha ma’n dhew dhen ow sedhy cosel ha teg dhe’n leur, en còsk down. Ma Ownter Matty ow pejya càna y lull ha lay.

“A Morgana ger, apert yw, yma kaletter lowarth genen ni omma. Hwennen ankemmyn yw hemma! An Tev-Le, martesen. Eus kur dhiso jy?” Ma Mabm Wydn ow whilas et hy thigen vrâs ha cavas sten bian leun a bodn gwer spladn.

“Hemm ew effeythüs rag an brâssa radn a daclow!” emedh hei.

Ma hei ow poltra nebes podn war an den bian en còsk war an leur. Feryek, thera nei ow mires orto ha ev dhe expondya tabm ha tabm dhe y vrâster normal.

“Ty a yll sevel dhe gana, Mathaw.” Ma’n dhew dhen ow tifüna ha mires adro. Pur amayes en jei.

“Me a veu degys dhe ves gen Best Goon Bren,” e’medh an eyl. “Mehal henwys ew ev.”

“Che a lehas!” e’medh y gila. “Che a veu brâster an dolly ow noyth.”

“Aswonys ow whei genam!" emedh Tas. "Whei dhew a wrüg eva re e’n tavern, theram ow pedery. Po wrügo whei kemeres neppeth creffa? Res ew dhebm cows gen dha vroder Nathan. Tho whei clav an dhew. Whei a godhas en còsk e’n lowarth nei. E veu dhewgh hendròs drog po terneyja drog. E’n termyn a vedn dos, na wrewgh eva re. Ha gwrewgh sconya droggys.

My vedn agas lewya dhe’n drev lebmyn, bes nag eus whans dhebm agas gweles et agan lowarth arta.”

Chaptra Eth Warn Ügens: Wòja an Visyt

Wòja an froth agan visytoryon heb gelwel, anvodhek ew Rosa ha my dhe vos e’n gwely arta.

Ma Tas ow kemeres an düs medhow yonk tre dh’aga fobel e’n dreveglos.

Ma Gorownter Marcus ow mos tre der crow an gever.

Ma Mabm Wydn ha Henvam ow kemeres Mehal Marthys tre dh’aga chei bian.

Ma Ownter Matty ow mos tre dh’y lester-gwary. Na vedn ev ûsya an chambour parys ragtho gen Mabm.

“Nag ew da genam còsca war an dor brâs,” ma va ow styrya.

Ma qwestyon dhebm rag Tas ha theram ow còrtos heb perthyans. Ottava wostiwedh!

“Rag fra na wrüg an den yonk treylya dhe bodn pecar’a ‘gan garednow fav?”

“Martesen an alcohol et y wooj a wrüg y sawya. Lebmyn, ke dhe’n gwely!”

Chaptra Naw Warn Ügens: Wòja Hedna

“A vedh an gath oll en compòster?” Rosa ew nebes troblys. Bestes ew da genjy. “Mehal ’wrüg tegy an den bian et y anow. Martesen ev alja lehe ewedh po, meur lacka, treylya dhe bodn pecar’a ’n garednow fav na. Nag era lycour e’n gooj ev.

“Gero nei mos, dhana, dhe weles.”

An nessa dedh ew, ha otta Mabm Wydn et hy lowarth. Nei ell gweles Mehal a’ y wrowedh derag daras a’n gegin. En còsk down ew ev – ha nag ew ev gwedhrys.

“Ew an gath oll en compòster?” Rosa a res bos assurys.

“Entei. Rag fra na? Mehal Marthys ew ev. Lebmyn, ma whel dhe wil.” Ma bottel bian et hy dorn.

“Ew hedna ‘Tev Le’ arta?” my a venja godhvos. Theram ow mires worty ha hei ow tivera badna war brysken. Henn ew an brysken gasadow lebma wrüg an den yonk wheja. Ma’n brysken ow mos mes a wel – dhe dra veth.

“Me a vedn gonis gwedhen spernek ena, a jei dhe spas,” emedh Mabm Wydn.

Chaptra Deg warn Ügens : Best Goon Bren

Otta nei e’n scol, moy diwedhes e’n seythen, ha Tamsin Penrose ew ynflamyes.

“Best Goon Bren ew gwelys gen agan ownter war an mena. Thera va ow kerdhes war nans dhort an tavern gen y gòthman. Ogas veu anjei dhe'n chei whei, theram ow pedery. Eus gwelys genowgh an Best? Pecar'a hûjes cath dû ew ev - ha henwys Mehal, herwydh Ownter. Mar vrâs o an Best, ev a guntellas y gòthman et y anow.”

"Nag ew an Best cath nei, dhana," emedham. "Ma dhen cath brith bian pur wheg."

“A’n wrüg an Best debry ev?” ma Rosa ow cofyn.

“Na. An Best a’n aras dhe godha, bes ev a veu pur glav. Ma Tas ow leverel dr'o an dhew mar vedhow vel Peraner."

Chaptra Üdnek warn Ügens: Dedh Sportys

Ma pedn bledhen an scol ow tos nes. Scon e vedh an degolyow hav. Nag eus dhen agan descansow ûsadow. Et aga le, ma traynyans dhen ha practisys rag dedh sportys. Thera nei ow tesky fatel pònya ha lebmel der vaner own: ûgh-lebmel, hir-lebmel ha dres lettys. En howl spladn, thera nei en pras an scol, poken thera nei en hel an scol. Pup pres ma Rosa ha my ow whilas cònines a-dhelergh dhe’n ke, bes nag eus nevra nagonan veth oll – na whath onan gwels.

Da ew genam pònya, bes na ellama lebmel vetholl. Theram ow trebüchya war ow threys ow hònan. Contrary ew Rosa. Da ew genjy lebmel bes na ell hei pònya. Wharthüs ew hedna, drefen nei dhe vos gevellesow egwal.

Wotiwedh! Dedh sportys ew. Ma teylûyow ha cowetha ow tos dhe vires orta nei. En gwelha pres, ma’n howl ow spladna ha ma routh lôwen war an pras. Ma Rosa ow qwaynya an kesstrif hir-lebmel e’n poll treth. Rag hebma ma hei ow fanja snod rüdh ha testscrîf. Tho vy an diwettha e’n fesk ügens meter. En kensa thera vy ow ledya - bes nena mires war ow lergh ha trebüchya war an dhew droos ow hònan. Ma oll an re erel ow tremena ha my ow strechya war an dor. Bes na fors. Thera vy ow tos secònd e’n resek pajar cans meter ha cawas snod blou ha testscrîf.

Wòja an resek ma, ema nebes resegow didhan. Ma nebes flehes ow diwrosa dhe scol. Ma resek diwros-lent specyal dhodhans. Na res anjei gòrra troos war an leur po mos war dhelher, ha’n diwettha flogh dhe dremena an lin finsya ew an gwaynyer (na an kensa). Ma othom dhodhans a omborth pur dha.

Ma resek rag agan breder ha horydh bian. Ma kerens ow sevel ganjans war an lin dalla, ha thera nei ow sevel reb an lin finsya ha ’ga gelwel anjei. Nebes flogh na vedn gara aga mabmow. Ma radn anodhans ow pònya nebes ladnow, nena treylya tre. Ma ’gan broder bian ow pònya pecar’ an gwens dhe Rosa!

“Hura Arthòr. An campyer os ta.” Bes ma powasow dhodhans oll, may nagonan dh’ omglowes omittyes.

Ma whath resek rag kerens wydn ha damyow. Resek oy-ha-lo ew. Res ew dhodhans pònya, ow mantolly oy en lo, gen üdn dorn en üdnek. Lebmyn theram ow kemeres sowdhan. Barthüjek ew Henvam, ow pònya moy üskis avel Mabm Wydn. Saw difednys ew hei - rag gara hy oy dhe godha hag y bôtya dreus dhe’n lin finsya. En termyn eus passyes oyow gwir o ûsyes, bes lebmyn thens plastik. Ma Tas ow leverel dr’ew hebma rag reson a yehes ha sawder, kebmys a oyow a veu terrys. Ma Mabm ow leverel dr’ew drog dhe wastya boos, war neb coor. Ma lies ganow nownek dres oll an bes.

Ma resek sagh rag tasow. Mons ow cül devnydh a sehyer specyal gwres a yscar. Ma sehyer shoppa ha sehyer adalgist plastek ow sqwardya gen re a es. Res ew dhe bub den gorra y dreys abervedh et y sagh ha lebmel rag heb codha dhe’n dor. “En termen eus passyes,” emedh Mabm Wydn, “nei ‘wrüg perna tettys, ys ha bleus en sehyer pecar’ an re na. Pur boos o anjei. Lebmyn ma dhen sehyer paper ha behatna ens. Tas ew pur dha. Ma va ow tedna y sagh dh’y gres ha terlebmel pecar’a kangarou.

An resek trei-garrek ew ow resek an gwelha. Ma Rosa ha my o qwaynya pub pres. Ma tüs o leverel dr’ew dreven nei dhe vos gevellesow. Thera nei owth obery warbarth pur dha.

Dedh Sportys ew sowena. Ma gwary teg dhen. Lôwen o nei oll gen agan powasow ha thera nei ow mos tre contentys. Nessa seythen e vedh dedh sportys dhe’n scol Tristan ewedh, bes na ell Rosa ha my mos.

Chaptra Dewdhek warn Ügens: Derivasow Scol

  Diwedh an tremmîs hav ew - ha termyn rag derivasow scol. A vedh da ow derivas?  Ma maylyer et ow sagh dhort ow descadores. Ma maylyer pecar e’n sagh Rosa ewedh, dhort hy descador hei. Thera nei ow rei anjei dh’agan dama. Ma hei ow redya gen minwherin.
  “Tremenys pur dha ew agas kensa tremmîs e’n scol ma. Deskyblon plesont o whei, an dhiw, car dre hevel! Pur dha os ta Rosa gen enevales an scol, bes e veu nebes meschonsyow dhis. Os ta dornglikin en scol?  Heweres os ta Kettern gen flehes erel, bes nag es ta owth attendya en pub class. Os ta henrosyades? Ha terweythyow re davosek os!”
  “Kettern ew moy dornglikin avel my!” emedh Rosa. “Hei ’wrüg trebüchya et hy resek!” 
  “Entei, en descans corforek, Kettern a dal medra gwell en sportys!”
  “Ha ma Rosa ow tedna et hy levrow en class,” theram owth argya. "Attendyans hei nag ew perfydh."
  “Na wrewgh kenkya. Ema lies tra pur dha e'n derivasow ma. Kettern, en dorydhieth ha story, chy a wras ragdres pur dha adro dhe vorvorenyon en Kernow ha Lollas. Ha Rosa, ma skians brâs dhis ow tòchya mònyow.  
  “Da ew genam art”, emedh Rosa, “Pandr’ew leverys adro dhe art?”
  “Oh, ma gis art üdnik dhis. Hemm ew pur dha. Res ew artystys bos nowydhyanjek. Ha ma neppeth òbma ow tòchya mûsek rag Kettern. Codnyk os ta. Thesta ow seny an delen Geltek pur dha – ha eseles vas a’n keur scol os ta. Etho, ma gallos art dhe Rosa ha ma gallos mûsek dhe Kettern. Tho whei gevellesow pur haval, saw pur dheffrans o whei!”  
  “Pandr’eus aral?” my a vedn godhvos. 
  “Well, da ew gen Kettern gwil experyansow sciensek.”
  “Henn ew gwir. Da via genam bos losowores.”
  “Pyjy, na wra gònis fav moy!” Hemm ew Rosa.
  “Arithmetrek. Pur dha an dhiw. Chy, Rosa, reknys mòna en arbednek.” 
  “My a vedh gwicores pecar’a Modrep Senara.” 
  “Ha, an diwettha tra, redya ha scrifa, pur dha. Ma dhe Rosa dalhen gramer da. Ha dhe Kettern ma gerva vrâs.” 
  “Da ew genam whedhlow. Bes trûedh ew nag era nei ow kil an tavas Frenkek e’n scol ma.”
  “Oui, c’est domage."
  “A vedh Tas plesys?”
  “En certan.”

Chaptra Terdhek warn Ügens: Dedh war an Treth

  Scol a dhiwedhas de, de Gwener, rag an vledhen. De Sadorn ew hedhyw, ha teg ew an gewer.
  “Gero nei mos dhe’n treth,” medh Mabm wòja hânsel.
  Etho, thera nei oll ow cawas agan taclow ha gòrra anjei e’n carr brâs Tas. Nag eus meur a spas raga nei oll ha ’gan daffar. 
  E’n gwelha pres nag üjy Mabm Wydn ha Henvam ow tos genen. Pur vesy ens gen an gever, ha gen Gorownter Marcus et y joppa. Nag üjy Ownter Matty òbma en neb cas. Ma va war y lester-gwary. Ma re a düs en mis Gorefen rag Ownter Matty. Na vedn ev discüdha y lost pesk dherag presens an bobel.
  Ma Tas ow croffolas dr’ew re gostek an park kerry treth, bes nag eus whans dhen a gerdhes re bell gen agan daffar. Ma va ow pe! 
  Thera nei ow kemeres agan taclow ha cawas telher da war dreth gleb rag palas. En kensa, Rosa ha my, thera nei ow qweres dhe Arthòr derevel castel treth.
  “Arta,” emedh Arthòr. Ma whans dhodho a gastilly moy. Theram ow terevel üdn moy ha ma Rosa ow terevel dew anodhans.
  “Ew hebma lowr, Arthòr?” Wòja hebma, ma Arthòr ow palas canel tredh dew gastel. Thera nei ow tekhe an castilly gen gòbmon ha cregyn dhort merk an mortîd. Gòthüs ew agan broder bian hegarüs a besk marow, desehys ha divlas, ew kevys ganjo, dhe worra et y ganel.
 Ma Tas ow rei descans morplaynya dhe Tristan. Nag eus lysten gales dhodho e’n eur-ma, bes whath ew y vregh difresys.  Gwiskys ew an dhew en sewtys stanch, drefen whath bos an mor yeyn lowr. 
  “Eus whans dhewgh, an mowesy, morplaynya?” emedh Tas, bes nag eus whans dhen! Ma Tristan ow wherthin. 
  “Trûedh o whei!” emedh ev.
  Re yeyn ew an mor raga nei, whath gen sewtys stanch. Neyja nag ew da gen Rosa, en neb cas, ha gwell ew genam pollen dòbm. Üdn jedh, martesen, nei alja mos dhe Lollas, lebma vo tòbm an dowr. Alja Tas po Mabm cawas whel ena?
  E’n men termyn, gen Arthòr, thera nei ow whilas tollow bian e’n treth, tòbmys gans an howl. Ma pollen düs en carrek vrâs, bes homm ew goskeujys, ha whath moy yeyn avel an mor. Arthòr ell lagya e’n tollow, bes nag en jei down lowr rag neyja. 
  En kensa, thera Mabm ow saya omhowla, bes nag ew an treth pur gles. Nessa, thera hei ow saya redya, bes thera an gwens ow whetha an folednow hy lever. Etho, lebmyn, ma hei ow kemeres levren tedna, tabmow calgh ha glow predn dhort hy sagh. Scon, ma hei ow cül tednow ha cartoons didhanüs a bubonan war an treth.  
  Gwag o vy. Termyn hir ew a-ban debry hânsel. Ma othom dhebm a voos! Ma sehes dhebm ewedh.
  Ma Tas ha Tristan ow tos dhort an mor. 
  “Whath ma diw vregh ha nag eus lost pesk dhebm,” emedh Tristan, “Ha lebmyn, gwag o vy!” 
  “Res ew dhen degy agan taclow dhe neb le aral,” emedh Tas, “en üskis, ma’n mor ow tos pur ogas!”
  Ma’n mortîd ow colhy dhe ves agan castilly treth ha jûnya warbarth oll an tollow bian. Ma ’gan gòbmon bothlow, ha’n pesk sehys Arthòr, ow neyja arta. 
  Etho, thera nei ow mos dhe’n park kerry rag carga an carr, gen diw astel-blaynya war fram an to, buckettys ha palyow e’n cofer. Ha wòja hebma dhe Vor’ Dreth rag perna agan croust. Ma Tas, Rosa ha Tristan ow tewis hogednow (vêgan rag Rosa), bes Mabm ha my a vedn cawas pesk ha scòbmow. Nag ew da genam debry bes hogednow Mabm Wydn en üdnek. Ma Arthòr ow sconya debry tra veth saw dehen rew.
  Thera nei ow tebry agan boos war an glesin ogas dhe’n treth, drefen nag ew hebma maga dewesek avel an treth. Cas ew genam debry boos tewesek. Leun a düs ew remenat an treth, en neb cas, drefen leun an mortîd ha nag eus telher segh lowr gerys rag pubonan.
  “Kerdhes ew exercîs pur dha,” emedh Mabm war üdn labm. Da ew genjy nei dhe waya! “Gerowgh nei dhe gerdhes an aljow ahes. Martesen nei alja hedhes magor an eglos âwncyent encledhys e’n tewednow.”
  “Sav, Arthòr!” Solabres, ma ’gan meppik resek ow fesky tûa ’n stappys. “En üskis, pubonan! Grewgh y sewya!”

Chaptra Terdhek warn Ügens: Dedh war an Treth

  Scol a dhiwedhas de, de Gwener, rag an vledhen. De Sadorn ew hedhyw, ha teg ew an gewer.
  “Gero nei mos dhe’n treth,” medh Mabm wòja hânsel.
  Etho, thera nei oll ow cawas agan taclow ha gòrra anjei e’n carr brâs Tas. Nag eus meur a spas raga nei oll ha ’gan daffar. 
  E’n gwelha pres nag üjy Mabm Wydn ha Henvam ow tos genen. Pur vesy ens gen an gever, ha gen Gorownter Marcus et y joppa. Nag üjy Ownter Matty òbma en neb cas. Ma va war y lester-gwary. Ma re a düs en mis Gorefen rag Ownter Matty. Na vedn ev discüdha y lost pesk dherag presens an bobel.
  Ma Tas ow croffolas dr’ew re gostek an park kerry treth, bes nag eus whans dhen a gerdhes re bell gans agan daffar. Mava ow pe! 
  Thera nei ow kemeres agan taclow ha cawas telher da war dreth gleb rag palas. En kensa, Rosa ha my, thera nei ow qweres dhe Arthòr derevel castel treth.
  “Arta,” emedh Arthòr. Ma whans dhodho a gastilly moy. Theram ow terevel üdn moy ha ma Rosa ow terevel dew anodhans.
  “Ew hebma lowr, Arthòr?” Wòja hebma, ma Arthòr ow palas canel tredh dew gastel. Thera nei ow tekhe an castilly gen gòbmon ha cregyn dhort merk an mortîd. Gòthüs ew agan broder bian hegarüs a besk marow, desehys ha divlas, ew kevys ganjo, dhe worra et y ganel.
 Ma Tas ow rei descans morplaynya dhe Tristan. Nag eus lysten gales dhodho e’n eur-ma, bes whath ew y vregh difresys.  Gwiskys ew an dhew en sewtys stanch, drefen whath bos an mor yeyn lowr. 
  “Eus whans dhewgh, an mowesy, morplaynya?” emedh Tas, bes nag eus whans dhen! Ma Tristan ow wherthin. 
  “Trûedh o whei!” emedh ev.
  Re yeyn ew an mor raga nei, whath gen sewtys stanch. Neyja nag ew da gen Rosa, en neb cas, ha gwell ew genam pollen dòbm. Üdn jedh, martesen, nei alja mos dhe Lollas, lebma vo tòbm an dowr. Alja Tas po Mabm cawas whel ena?
  E’n men termyn, gen Arthòr, thera nei ow whilas tollow bian e’n treth, tòbmys gans an howl. Ma pollen düs en carrek vrâs, bes homm ew goskeujys, ha whath moy yeyn avel an mor. Arthòr ell lagya e’n tollow, bes nag en jei down lowr rag neyja. 
  En kensa, thera Mabm ow saya omhowla, bes nag ew an treth pur gles. Nessa, thera hei ow saya redya, bes thera an gwens ow whetha an folednow hy lever. Etho, lebmyn, ma hei ow kemeres levren tedna, tabmow calgh ha glow predn dhort hy sagh. Scon, ma hei ow cül tednow ha cartoons didhanüs a bubonan war an treth.  
  Gwag o vy. Termyn hir ew a-ban debry hânsel. Ma othom dhebm a voos! Ma sehes dhebm ewedh.
  Ma Tas ha Tristan ow tos dhort an mor. 
  “Whath ma diw vregh ha nag eus lost pesk dhebm,” emedh Tristan, “Ha lebmyn, gwag o vy!” 
  “Res ew dhen degy agan taclow dhe neb le aral,” emedh Tas, “en üskis, ma’n mor ow tos pur ogas!”
  Ma’n mortîd ow colhy dhe ves agan castilly treth ha jûnya warbarth oll an tollow bian. Ma ’gan gòbmon bothlow, ha’n pesk sehys Arthòr, ow neyja arta. 
  Etho, thera nei ow mos dhe’n park kerry rag carga an carr, gen diw astel-blaynya war fram an to, buckettys ha palyow e’n cofer. Ha wòja hebma dhe Vor’ Dreth rag perna agan croust. Ma Tas, Rosa ha Tristan ow tewis hogednow (vêgan rag Rosa), bes Mabm ha my a vedn cawas pesk ha scòbmow. Nag ew da genam debry bes hogednow Mabm Wydn en üdnek. Ma Arthòr ow sconya debry tra veth saw dehen rew.
  Thera nei ow tebry agan boos war an glesin ogas dhe’n treth, drefen nag ew hebma maga dewesek avel an treth. Cas ew genam debry boos tewesek. Leun a düs ew remenat an treth, en neb cas, drefen leun an mortîd ha nag eus telher segh lowr gerys rag pubonan.
  “Kerdhes ew exercîs pur dha,” emedh Mabm war üdn labm. Da ew genjy nei dhe waya! “Gerowgh nei dhe kerdhes an aljow ahes. Martesen nei alja hedhes magor an eglos âwncyent encledhys e’n tewednow.”
  “Sav, Arthòr!” Solabres, ma ’gan meppik resek ow fesky tûa ’n stappys. “En üskis, pubonan! Grewgh y sewya!”

Chaptra Peswardhek warn Ügens: Descansow Neyja

  Bestes ew da gen Rosa. Marhogeth ew da genjy en arbednek. Esel en clubb marhogeth ew hei. Saw cas ew genjy sportow dowr. Tho nei kehaval an eyl hy ben en lies gnas, bes thera nei ow cül sportow dihaval. 
  Neyja ew da genam. Esel o vy en bagas neyja. Thera nei ow mettya warbarth e’n poll an düs en Trurû ha desky fatel neyja ha sedhy. Terweythyow, thera nei ow tonsya warbar e’n dowr gen keveylyans mûsical. Da ew genam hedna. Thera nei ow tesky strocas brodn, neyja tycky-Duw, neyja war y fas ha neyja war y geyn. Thera nei ow tesky fatel neyja dadn an dowr, ewedh. Nag eus benk sedhy, etho na ellen nei bes gwil labmow resek. Na ellen nei gwil labm ûhel.
  Na ellama neyja en üskis. Na ellama gwil bes neyj bròdn pur dha. Theram ow neyja pecar’a qwilkyn, car dre hevel dhebm! Nag o vy pur smodh na pur rasek. Bes na vern, me a ell neyja pelder hir heb bos re skith. Yagh o vy.
  “Exercîs pur dha ew neyja,” emedh Mabm.
  Üdn gordhûher e veu gool neyja dhen. Kerens ha cowetha a dheuth dhe vires orta nei. Nei a wras disqwedhyans donsya e’n dowr gen mûsik, ha wòja hedna nei a resegas. Na wrüga vy gwaynya tra veth.
  Ownter Matty a viras ortam. An nessa jedh ev a leveras,
  “My a dal rei dhis nebes descansow neyja erel. Nag ew dha arrow pur dha. Res ew dha golon bos creffa. Ma othom dhis a neyja pecar’a reun po pecar’a morhogh, na pecar’a qwilkyn. Martesen, chy alja neyja pecar’a morvoren. Nena chy a via moy üskis. Nei a wra obery warbarth e’n degolyow.”
  Ha lebmyn, otta nei e'n degolyow hav. Bes pe le vedn Ownter Matty rei descansow ragam? An pollen düs en Trurû a vedh pur vesy. Ha na alja va mos e'n mor y hònan rag own a gawas lost.

Chaptra Pemdhek warn Ügens: Henvam Arta

  Degòlyow hav ew. An kensa seythen ew. An kensa dedh ew. Lôwen o vy.
  “Pur vesy o vy hedhyw,” emedh mabm.  “Ha Tas ewedh. Res ew dhewgh mos dhe’n chei Mabm Wydn ha Henvam rag an jedh.”
  “Nei oll?” a venjama godhvos.
  “Oll! Mabm Wydn a vedn fyttya kidnyow rago whei.”
  “Prag na ellen nei dos genes?”
  “Ma othom dhebm a oll an spas e’n carr bian vy rag ow jednas ha pictours. Ma disqwedhyans dhebm rag üdn seythen e’n cresen lowarth. Ma esperans dhebm my a vedn gwertha pup tra. Ha ma Tas ow mos bys en Scottlond rag effects specyal en fylm aventur. Tas a vedn kemeres an carr brâs leun a bub tra ev.”
  “My a vedn obery gen Gorownter Marcus.”  Pur ervirüs ew Tristan.
  “Rosa ha Kettern, res ew dhewgh gòrra with a Arthòr, mar pleg. Pur üskis ew ev. Na wrewgh y gelly.” 
  Etho, thera nei ow mos, pajar flogh, a-dreus pras an gever, dres an rew a wedh Nadelik, dres crow an gever hag oll an treven erel e’n lowarth Mabm Wydn, bys en daras kegin hy chei. Moy sygür o nei del ûsyes drefen ma whans dhe Arthòr leverel ‘Mettin da’ dhe geniver gavar. Bulhornes alja bos moy üskis. 
  “Welcòm o whei oll,” emedh Mabm Wydn. “Ma lies tra dhe wil hedhyw. En kensa, gero nei mos bys en Pow Frenk. Henvam a venja disqwedhes neppeth dhewgh. Bes kemerowgh with na wrewgh whei gòrra troos war an dor gwedhra!”
  “Pe le ma Henvam? Ew hei gellys solabres?” my a venja godhvos.
  "Ea. Gellys ew hei."
  Etho thera nei ow mos en crow an gever. Ma Rosa ow senjy dorn Arthòr en tydn. Ha Mabm Wydn ow keas an daras thera nei en tewlder. Ma Tristan ow herdhya an clôs gora. 
  “Ôpyn sesame!” emedh ev. Otta! Ma radn brâs an vos owth egery avel daras. Ma howlsplan brentin tû aves.
  “Kei!” Ma gwelys neppeth gen Arthòr ha ma va ow scappya dhort Rosa ha pònya a-rag. Theram ow qweles Gorownter Marcus ow kerdhes en ogas gen hûjes kei dû.
     “Sav, Arthor!” Bes Rosa ew re dhiwedhes. Solabres ma diwvregh agan broder bian adro dhe’n codna an best. Ha nag üjy an kei ow scrynkya na brathy.
  “Ew hedna kei en gwrionedh? Pehên best ewa? Na wrüga vy besca gweles kei a’n par na. Thewa mar vrâs avel gonhelhy! Alja va bos diantel?”
  “Kei bresel ew. Canis Molossus henwys ew. Saw nag eus bresel hedhyw e’n jedh, ha nag eus kei a’n par ma en Kernow. Nag eus othom dhen a gasgy.” Ma Mabm Wydn ow gorreby, drefen na wör Gorownter Marcus clappya Kernôwek.
  “Salve Marce!” Thera nei oll ow salüjy an den. Na wörama fatel salüjy an kei! Ma Rosa ow mos dh’y smodhya bes moy war o vy. 
  “Rag fra ma kei òbma?” my a venja gòdhvos.
  “Ellama presentya Molly,” emedh Mabm Wydn. “Gast ew hei, ha ma hei ow qwitha hy theylû avel mabm, dhort ladron ha bleydhes.”
  “Hy theylû?”
  “Entei, nei ew hy theylû. Hei ew kei deves ha tho nei hy deves! Ott! Pur lôwen ew hei gans hy enas nowydh. Ha lebmyn, res ew dhebm mos tre rag fyttya an kidnyow. Na wrewgh ankevy whei a dal debry teyrgweyth pub jorna. Anowr!" Ha, gen an geryow-ma, ema Mabm Wydn ow mos. 
  Distowgh ma Molly ow terevel hy fedn. Ûghhewol ew hei. Ma clowys neppeth genjy. Theram ow mires en keth qwartron. Ma cloud a dhoust ha tros a ewinas carnow ow tos nes. Pandr’ewa?
  “Salve Prima”, ma Marcus ow wherthin. Henvam ew. Ma hei en charet tednys gen margh. Ma’n margh ow powes reb Molly, ha ma’n dhew vest ow tava minow. Còthmans ens.
  “Piw a vynn troyllya?”

Chaptra Whetek warn Ügens: Troyllya

  Theram ow mires orth an margh ha’n kei. Cosel ens, etho nag eram ow kemeres own. Theram ow pedery down. Na wrüga vy besca bos en charet kens lebmyn. Rag fra na? My a venja troyllya gen Henvam. Rag fra na? Ma Rosa ha Arthòr e’n charet solabres, bes ma Tristan a y sav reb Gorownter Marcus ha Molly. Na vedn ev tos. Ma whans dhodho gwil nebes whel gen Marcus.
  “A nag eus esedhva po grügys sawder e’n charet?” my a venja godhvos.
  “Nyns eus,” emedh Henvam. “Yma spas rag sevel yn unnik. Res yw bos a’th sav ha synsy fest min an charet.”
 “Nag eus tâl-hattys genen. Mabm na vedh lôwen.”
 “Nyns yw hemma charet resek. Nyns eus marnas unn margh. Ny vynn Incitatus ponya re uskis. Ty a yll kerdhes mar mynnydh.”
  “Na vadna vy. My a wra dos genowgh.” 
  Thera nei en gwel brâs a vagasow lavender, bes ma rosva e’n cres, ow ledya tro ha gwydhlan en pellder. Ma Henvam ow treylya an margh ha’n charet ha theron ow mos en-kerdh, tûa’n wydhlan, gen Molly ow pònya reb an margh. 
  “Nyns eus scol avorow,” emedh Henvam. “Chons da yw dhe guntel flourys ha gwil perfûm genev, mar mynnowgh.”
  Hedna via da, dhe’m bres vy. Bes lebmyn thera nei ow trehedhes min an gwedh. Ma’n margh ha’n kei ow powes, ha ma’n margh ow tallath debry nebes gwels. Ma Molly ow corwedha war an gwels en üdn dyena. 
  “Lemmyn,” emedh Henvam, “dewgh genev. Yma neppyth dhe vos gwelys.” 
  Helyk ew an gwedh, martesen cans po moy. Rag fra? “Yma’n bobel omma ow ûsya an sethennow rag gwil canstellow.” Ma Henvam ow redya ow bres!
  Ma Arthòr ow pònya emesk an gwedh. “Sav, Arthòr!” Bes na vedn Arthòr gortos. Ma va ow mos mes a wel, ha desempyas ma crei. Plosh! Codhys ew Arthòr en nebes dowr. Mabm na vedh lôwen.
  Thera nei oll ow fesky tûa’n son, bes thew Molly whath moy üskis. Ma hei ow mos mes a wel emesk an gwedh. Ha nei ow trehedhes an dowr, otta Arthòr ha Molly a ’ga sav war an ladn. Ma’n diwvregh maw gleb adro dhe’n codna gast leb. Ma ’gan broder bian ow wherthin. “Mowes da, Molly!” emedh nei oll.
  Bes pandr’ew an dowr? Nag ew plodn ha nag ew stagen. Poll ew emesk an helyk, saw nag ew poll heyjy. Pedrek hir ew, pecar’an poll neyja en Trurû, ha cler ew an dowr. Nag eus an keth blas avel pollen düs. Ha my ell gweles puskes ow neyja e’n dowr. 
  “Hemm yw pysklyn Marcus,” medh Henvam. “Yma nebes fentynnyow ow ry dowr glan. Perfydh yw rag agas dyscasow neyja.”
  “Descasow neyja? Bes nag ew da genam dowr!” Nag ew Rosa lôwen. “Ew an dowr yeyn, Arthòr?” Bes ma ’gan broder bian ow wherthin. Nag ew ev troblys, kenth ew ev gleb. Na vedh Mabm lôwen.
  “Enti! Res yw dhe bub flogh yn Kernow godhvos neyja. Ny dal flogh vyth beudhy heb edhom. Mathaw Bras a vynn dos nessa seythen dhe ri agas dyskasow. Ha pub flogh yn teylû vy a dal marghogeth, Arthòr yn wedh.”
  “Marhogeth?” Lebmyn thew tro vy dhe vos ownekhes. “Bes mergh ew brâs ha scrüthüs!”
 “Gesowgh ni mos tre. Yn marghti yma nebes mergh byghan ragowgh. Byghanna yns i avel Incitatus. Marcus a vynn ri an dyskasow.”
  “Mos tre!” Clowys ew hedna gen Arthòr. Ma va ow pònya solabres tûa min an helyk.
  “Sav, Arthòr!” Bes na vedn Arthòr gortos. Ma va ow lebmel e’n charet ha gen flyckrans/flypp a’n fròdnow gellys ew ev. Na vedh Mabm lôwen. “Sav, Arthòr!” Bes na vedn Arthòr gortos. 
  Thera nei oll ow tallath pònya, Henvam ewedh. Incitatus ew üskis, saw na ell ev pònya mar üskis avel an gwens. Molly ew moy üskis. Nag üjy hei ow tedna charet.
  “Kergh, Molly!” Ma Molly ow trehedhes trenewen an margh ha tedna war üdn fròdn. Ma’n margh ow treylya adrenewen ha hedhy desempyas. 
  “Mowes da, Molly!” emedh nei oll. 
  Bes ma’n charet ow pejya ha treylya war y drenewen. Nag ewa bes gwres a bredn ha ma pup tra ow codha ales. Ma üdn ros vrâs ow rolya dhe ves ha towlys ew agan broder bian en bagas lavender.
  Ma Rosa ’h ola. “Ew an margh da lowr? Ew Arthòr da lowr?”
  Kevys ew nebes gwels gen an margh ha ma va ow tebry en cosel. Ma Molly ow kerna hy lost. Ha Arthòr?  A’y wrowedh ew ev en bagas brâs, gleb ha cüdhys gen lavender. Ma va ow wherthin pecar’a müscok. Na vedh Mabm lôwen.

Chaptra Seytek warn Ügens: Mergh

  Ma Henvam ow lôwsel Incitatus dhort an welen derrys ha tedna ’mann Arthòr dhort an bagas. 
  “Ni a dal mos tre,” medh hei. “Arthòr ty a dal marghogeth. Mes yn kynsa, yma edhom dhis leverel ‘gav dhymm’ dhe’n margh.” 
  Thera nei ow còrtos. A wra Arthòr leverel tra veth? Maw bian gen bohes geryow ew ev.
  “Gav dhymm! Gav dhymm! Gav dhymm!” emedh an maw bian. Henn ew whegh ger. Nag eus clowys genam mar lies ger dhorto en termyn hir. Ma va ow tava min an margh. Nena ma va ow tava keyn Molly.  “Gav dhymm!” emedh ev arta. 
  “Rosa, gwra ledya Incitatus, my a’th pys.” Ma Henvam ow liftya an maw gleb war geyn ledan an margh, ha theron ow mos rag. Ma chons dhebm dhe vires adro. Theram ow qweles crüg coynt en pellder, gen fos adro. Ew an re na cònines warnodho?
  “Pandr’ew hedna, a Henvam?”
  “Henna? An krug konines? Gola konines Marcus yw, leun a dell konines. Yth yns i an konines y’n hatt hir ow gour.”
  “Rag fra ma mar lies cònin dhe Gorownter Marcus?” my a venja godhvos.
  “Rag dybri, heb mar. Prag ken? Nyns yns i bestes chi.” Nag ew Rosa lôwen clowes hebma. Losowegores ew hei, ha hei a gar bestes oll.
  Nebes sygür o nei, bes wotiwedh otta treven Gorownter Marcus. Ma Marcus ha Tristan ow tos mes a’n stabel.
  “Salve, Prima!” medh Marcus.
  Ma Tristan ow terevel Arthòr dhe’n dor. “Uggh! Rag fra ew Arthòr gleb ha cüdhys en lavender?” ev a venja gòdhvos.
  “Whedhel hir ew!” mèdham.
  “Dewgh, mires ort agan mergh! Pur wheg en jei.”
  E’n stabel ma pajar gonhelhy, mens deffrans ha liwyow deffrans. Thew an behatna rag Arthòr. En scon ma’n diwvregh an maw adro dhe’n codna an best brith.
  “Gav dhymm!” emedh.
  “An brâssa ew raga vy,” emedh Tristan, “drefen ow bos hirra, ha cottha.” Etho ma dew vargh moy. An eyl raga vy ha y gila rag Rosa. 
  “Pe margh ew an moyha cosel?” Nebes ownek oma. Fatel ellama dewis? Dû po liw kesten? Hegar po hager? Martesen, Rosa a dal bos an kensa. Nag ew an gasek dhû mar deg avel an liw kesten, bès ma hei ow kerdhes war tûa’m. Ma hei ow settya hy fedn war ow scoodh. Ma hei ow tewis, ha lôwen o vy.
  “Gwag oma. E dal bos pres kidnyow lebmyn,” emedh Tristan. “Gero nei mos.”

Chaptra Etek warn Ügens: Powes rag Kidnyow

   Otta nei e’n gegin Mabm Wydn. An kensa tra dhe wil, ken debry kidnyow, ew seha Arthòr ha y wisca en dilhas segh. Prest ma nebes dilhas ragen en chei Mabm Wydn – pub termyn, dre happ, pa vo othom dhen anodhans.
  Ma pebys crampes pesk gen Mabm Wydn. 
  “Ew hebma pesk dhort an mor po pesk dhort pesklydn Marcus?” my a venja godhvos. 
  “Pesk Marcus ew rag Marcus hag y bobel en üdnek,” ew an gorthyp.
     Ma pasty gen losow ha keus rag Rosa, drefen na vedn hei debry kig. Ma Arthor ow sconya dhe dhebry tra veth. 
  “Gav dhymm!” emedh ev. Pana dermyn a vedn ev leverel neppeth aral?
  “Gwra saya tabm yos tettys,” ew tybyans Rosa. Sowena! 
  Ma diw gath ow tos e’n gegin. Da ew ganjans sawor a besk, theram ow sòppoja.  An gorgath dû  ew Mehal Marthys Henvam. An gath brith ew peth agan hònan. Hedhyw en jedh ma hei ow tremena termyn moy en chei Mabm Wydn avel en chei nei. Ma Arthòr ow ga gweles.
   “Gav dhymm!” ma va ow creia – ha ma loas a yos tettys ow neyja dres an gegin. E’n kethsam teken ma’n cathes owth aspia Arthòr ha diank. Ma loum a voos ow lagen war dharas glân Mabm Wydn.  
  “Gav dhymm!” emedh Arthòr, bes ma va ow wherhin pecar’a müscok. Wòja hebma na vedn ev debry tra veth moy.
  “Chy a vedh gwag,” emedh Rosa.
  Bès lebmyn, pres ew rag mos arta dhe’n pajar gonhelhy. Ma gòlhys gen Mabm Wydn nebes caretys dhort hy lowarth. Whath ma delkyow glas warnodhans.
  “Kemerowgh an caretys ma genowgh,” emedh hei. “An vergh a wra aga hara.” Ma hei ow rei anjei dhe gan broder bian. Ma va ow senjy an delkyow et y dhorn.
  En scon thera nei en tewlder e’n crow an gever. Pandr’ew an son na?
  “Arthòr, esta ow tebry caretys an vergh?”
  “Gav dhymm!” ma va ow hanaja gen ganowas a garetesen.
  Eneth arta ma Tristan ow herdhya an clôs gora war an vos dhelher.   
 “Ôpyn sesame!” emedh ev, ha eneth arta ma radn an vos owth egery avel daras.
  “Kei!” Wotiwedh, ger deffrans dhort Arthòr. Ma va ow cara remenat an caretys dhe godha ha pònya rag. Ma Molly ow resek dh’y vetya ha y knackya dhe’n dor.
     “Gav dhymm!” emedh Arthòr. Nag üjy va owth ola, bes ma va ow wherhin pecar’a müscok. Ma Molly ow tallath debry caretesen.
  “Sav, Molly! An re na ew rag an vergh.”
   Ma Tristan ow senjy an kei, ma Rosa ow sesya Arthòr ha theram ow cafel remenat an caretys. Thera nei ow mos dhe’n stabel.
   Otta Gorownter Marcus. Ma va ow restra Incitatus. Ma va ow leverel neppeth en Laten dhe Tristan. Ma Tristan ow treylya raga nei.
  “Ma scübelow war an styllen,” emedh ev. “Gwrewgh warlergh Marcus ha desky dhe wodhvos agas bestes.”
  Ma’n gasek dhû ow kerdhes war tûa’m arta. Ma hei ow settya hy fedn war ow scodh. Hei ew ow gonhelhy.
  “Eus hanow dhe’n best ma?” theram ow cofyn.
  “Nei ell henwel agan mergh agan honan,” Tristan ew üjy ow corryby ow qwestyon.
  Thera vy ow scübya blew dû an gasek dhort pedn dhe lost. Pur smodh ew hei. Tho nei pur gosel o nei. Da ew genam an sawor a margh. Thera vy ow criba  hy reun ha lost dhe lôwsel an colmow. Meur hy ferthyans.  Nag era vy ow kemeres own rag hei.

Chaptra Nawnjek warn Ügens: Marhogieth

  “My ’wör marhoga solabres.” Pur blesys ew Rosa gans hy gallos. “Bès ma othom dhebm a fròdn ha diber rag ow gonhelhy. Na ellama gweles taclow marhoga veth òbma.” 
  “Ma’n taclow marhoga e’n nessa crow.” Ma Tristan ow godhvos puptra, my a hevel. Ma va ow vysytya Gorownter Marcus en venowgh. 
  “Gero nei mos, dhana!” ma Rosa ow temondya.
  “My a vedn kerhes agan fròdnow,” emedh Tristan, “ha nei ell kemeres an bestes dhe gawas an dibrow. Gorownter Marcus a wras an dibrow y hònan. Pur skentel ew ev.”
  Pur gosel ew agan broder bian. Ev a viras orta nei oll an termyn ha wrüg warlergh nei. Nag ew ev da gen cathes bès, martesen, ev a vedh da gen mergh.
  “Res ew dhen pedery a henwyn,” emedh Rosa. “Pandr’ew henwyn fytty rag mergh?”
  “Gav dhymm!” emedh Arthòr.
  “Edrek, Arthòr. Nag ew hedna fytty. Res ew pòrres dhe drouvya an hanow own.”
  Otta Tristan arta. Ma va ow ton bagasow a vondys crohen, gen nebes besowow brons.
  “Bès nag ew an re ma pecar’a fròdnow Club Gonhelhy vy.”  Ma Rosa ow kemeres marth. “Nag eus tra veth rag an ganow. Cabestrow ens.”
  “An re ma ew fròdnow wheg. Marcus a vedn disqwedhes dhen an maner own dh’aga gòrra ‘dro dhe’n pednow agan mergh.”
  Rag fra nag üjy Rosa ow croffolas adro dhe’n crohen? Da via genam godhvos hedna. Crohen ew knes bestes – ha vegan ew hei.
  “Bès fatel ellen nei aga rowlya gen tra veth e’n ganow?”
   “Ev a vedn disqwedhes hedna dhen ewedh.”
  Gorfednys ew Gorownter Marcus gen Incitatus ha ma va ow tos rag gweres dhen. Na ellama ònderstondya üdn ger ew leverys ganjo, bès my ell gweles an dra ew gwres ganjo gen gonhelhy brith Arthòr. Lebmyn my a wör an maner dh’y wil ow hònan gen casek dhû vy. 
  “Gero nei whilas agan dibrow.”     
  Thera nei ow ledya agan bestes dhe’n nessa crow. Ma cledhren reb an vos. Nei ell kelmy an fròdnow adro dhe’n gledhren. En kensa, ma dhen ledn lies liw rag keyn an margh. 
  Ma Gorownter Marcus ow kerhes diber bian rag gonhelhy Arthòr hag y gòrra war an ledn. Ma bond, pecar’a grügys, leb mos dadn an dorr hag ew tednys tydn. Henn ew an gîs. Ma peder kernik dhe’n diber. Ma va ow settya Arthòr war an diber gans y arrow tredh an kern. Thewa pecar’a esedh flogh gen peder dornla. Arthòr ell aga senjy heb codha dhe’n dor.
   “Gav dhymm!” emedh an maw bian.
  Pana dermyn a vedn ev leverel neppeth deffrans?
  “Gaudeo!” emedh an den brâs. 
  Nag üjens ’h ònderstondya an eyl ha y gila, bès da ew an ger gen Arthòr. Ma va ow tava codna an gonhelhy. Ma va ow leverel an ger. Henn ew lebmyn hanow an gonhelhy: “Gaudeo”. Fatel ellama trouvya hanow rag an gasek dhû wheg vy?
  “Pandr’a wrüg ev leverel?” theram ow cofyn orth Tristan.
  “Welcòm os ta po lowen o vy,” ew y worryp.
  Thera nei ow cawas dibrow fytty rag an bestes erel. Esy ew gòrra an dibrow warnodhans. 
  “Nag eus gortharethow rag agan treys. Fatel ellen nei crambla emann?” Ma Rosa ow croffolas arta.
  “Mir!” emedh Tristan. “Ma stappys sten. Chy a ell crambla warnodhans en kensa. Po e vedh othom dhis a dhesky lebmel gen gwelen.” 
  Ma va ow ledya y vargh dhe’n stappys rag disqwedhes dhen, bès en kensa an fròdnow a res bos derevys a-dhelher dhe’n codna.
  Thera vy ow lôwsel ow hasek dhort an gledhren rag hy ledya dhe’n stappys. Bès straft ma hei ow mos war bedn dewlin m’allama crambla emann. Fatel üjy hei ow wodhvos? Pana best còdnyk.
  Pana nessa? Ma Gorownter Marcus ow lôwsel gonhelhy Arthòr ha rei an fròdnow dhe’n maw bian. Ew hedna tybyans da?
  “Gav dhymm!” Distowgh, ma Arthòr ow shâkya an fròdnow ha pôtya diwwewen bedn ternewednow an gonhelhy. “Gaudeo”, ma va ow creia ha’n best ow resek e kerr ganjo. Mons ow mos rag troha’n besklydn a bell.
  “Sav, Arthòr!” Otta nei arta! Bès na vedn Arthòr stoppya po, martesen, na ell ev stoppya. “Gaudeo!” Ma va ow wherhin pecar’a müscok. Arta! Martesen na vedn Gaudeo hedhy. A wra Arthòr codha e’n dowr arta? Po a wra va tira en bagas lavender arta?
  Ma Rosa ha Tristan, war aga mergh brâssa ha scaffa, owth aga chassya. Na vedn ow hasek dhû gwaya, etho res vedh dhebm gòrtos òbma terebo anjei dos tre. 

Chaptra Dogens:

ew

Cookies help us deliver our services. By using our services, you a

1. Ma’n Daralla ow Tallath  

  “Ma othom dhebm a olifans gwydn.” Lev ow hôr Rosa ew hedna.  

  “Gwra gofen orth dha dhama wydn.” Lev agan dama ew hedna. Ma hei ow cosôwes bes hanter ort Rosa. Hanter hy rach ew kemerys gen caletter aral. Fatel ell hei gwitha agan broder bian dhort towla brodnyon ort an gath. Ma dhodho gallos marthys rag nebonan bes trei bloodh coth. 

  “Prag a venjes ta cawas olifans gwydn, poran?” Henn ew agan sira, pup pres den heweres.  

“Rag an gwerth olifans gwydn en fer an scol, entei. Rag fra ken?”  

“Drog ew genam, chîl vian, dhe egery dha lagajow, bes nag ew gwerth olifans gwydn rag gwertha olifanjes gwydn.”   

“Nag eram ow convedhes.” Ma mir trûan dhe Rosa. 

“Olifanjes gwydn ew taclow nag eus whans anodhans dhe düs na velha.”  

“An taclow henwys atal gen Mabm?”  

“Nantei. Anjei ell bos da lowr, bes na ell tüs cavas ûs vetholl ragtans.”  

“My alja ûsya olifans gwydn.”  

“Ma taclow ew destnys dhe vos olifanjes gwydn. Pernys ens ha wòja hedna thens res dhe ves, dhe vos gwerthys arta. Thens radn an economiedh.”  

“Na whath, penag oll vo anjei, ma othom dhebm a onan anodhans. Eus olifans gwydn dhis?”  

Lebmyn ma geryow Tas ow tasseny geryow Mabm. “Gwra gofen orth dha dhama wydn.” 

Nei geth, rag hedna, Rosa ha vy, dhe’n chei bian agan dama wydn en ogas; a-dreus pras an gever, dres an rew a wedh Nadelik, dres geverjy ha gweythva e’n lowarth, ha bys e’n daras kegin agan dama wydn.