Daralla Olifanjes he Bestes Erel 2

2. En Chei Mabm Wydn

   “Mabm Wydn! Ma othom dhebm a olifans gwydn.” 

   “Ha Rosa. Ha Kettern. Dewgh chei! Olifans gwydn? Gero nei whilas olifans gwydn.” 

   Rag fra nag eus marth dhedhy? Da via genam godhvos. Eus olifans gwydn dhedhy, martesen? Ma hei ow ledya nei bys e’n chomber hei. 

  “Gwra egery an ambry, Cattern.” 

  Theram owth egery an ambry, saw nag eus olifans gwydn etto. Et y le ma skeyl, ow sevel emann tûa soler dadn an to deiys. 

 “Gerowgh nei mos emann.” 

  Lebmyn theram ow kemeres marth. Mabm Wydn ew coth, bes hei ell crambla pur üskis. En scon thera nei oll e’n soler reb cofer cawrek. 

 “Gwra egery an cofer, Rosa.” 

  Ma lies tra e’n cofer. Gorlenwys ewa gen oll sortow taclow. Na ellama gweles olifans gwydn veth. Ma nebes dilhas coth ha pil a vlew dû, pecar’a best marow. 

  Adhesempis, ma’n pil ow qwaya. Theram ow lebmel ha ma Rosa owth üja. Ma’n pil a vlew dû ow sevel emann war beder garr gompes ha nena, gen hager tros, ma va ow pònya dres leur an soler dhe’n skeyl ha mos mes a wel. 

 Ma Mabm Wydn ow wherhin, “Mehal! Me a wrüg crejy dro va kellys. Pana gath wòcky!” 

 “Pana dermyn a wrüg an gath mos war stray, Mabm Wydn? Na wrüga vy hy besca gweles kens lebmyn.” Da via genam godhvos. 

 “Nanj ew lies bledhen, chil vian.” 

 “Rag fra nag ew hei marow, dhana?” 

 “Drefen bos Gorgath Marthys. Mehal Marthys henwys ew ev.” 

 “Ha piw a bew an Gorgath Marthys na?” 

 “Dama vy, agas hen-henvam.” 

  “A vedh an gath oll en compòster?” Rosa ew troblys. Bestes ew da genjy. 

 “Entei. Ha lebmyn, fatla kra nei trouvya olifans gwydn?” 

 Dadn an dilhas ma taclow erel, mar lies tra. Thera nei ow kemeres marth pothew neppeth kevys gen Mabm Wydn - na üdn olifans en üdnek saw dew olifans. Nag ew anjei gwydn poran, ha nag ens brâs na neyl. Bian ens ha nebes melyn.

 “Thew an olifans-ma gwrês a dhans olifans.” 

 “Hedna ew banys, anan?” 

 “Cübmyes ew mothew coth lowr.” 

 “Ha ew hebma coth?” 

 “Entei. Pur goth ew.” 

 “Ha’n olifans aral?” 

 “Henn ew gwres a blastyk.” 

 Coynt ew an dhew olifans. Ma garrow hir ha tanow dhe’n olifans dans olifans ha dhe’n olifans plastyk scovarnow brâs avel an re Dumbo. Ma mir hager dhodhans, ort ow breus. 

 “Teg ens!” Henn ew Rosa. “Da ew genam an olifanjes-ma. Me a’s car anjei!” 

 “Ma othom dhis a olifanjes gwydn rag an scol, anan, Rosa? Ha chy, Cattern? Eus othom dhiso jy a neppeth rag an scol?”

 “Dilhas coth. Pur vlewek.” 

 “My a wra whilas. Martesen an re ma a via da lowr. Nag ens re vlewek. Thera anjei war an wariva. Dhe les ens. Tas vy o hüdor a’n wariva. Nag eus othom dhodho. Ev a verwas.” 

 Ew Mabm Wydn nebes grevys gans hy thas? Da via genam godhvos. 

 An dilhas ew hatt hir dû ha mantel dhû. Thew an dhew nebes skith ha podnek, bes da ens genam. Lebmyn tho vy maga lôwen avel Rosa.